2022 റൈഡര് മാനിയയില് ഹിമാലയന് മൂന്ന് പുതിയ നിറങ്ങള് കൂടി നല്കി റോയല് എന്ഫീല്ഡ്. ഗ്ലേസിയര് ബ്ലൂ, ഡ്യൂണ് ബ്രൗണ്, സ്ലീറ്റ് ബ്ലാക്ക് എന്നിങ്ങനെ മൂന്ന് കളര് ഓപ്ഷനുകളില് കൂടി റോയല് എന്ഫീല്ഡ് ഹിമാലയന് ലഭിക്കും. ഇതിന് മുമ്പ് ഗ്രേവൽ ഗ്രേ, ലേക്ക് ബ്ലൂ, റോക്ക് റെഡ്, സ്ലീറ്റ് ഗ്രേ, സ്നോ വൈറ്റ്, ഗ്രാനൈറ്റ് ബ്ലാക്ക്, പൈന് ഗ്രീന് എന്നീ നിറങ്ങളിലായിരുന്നു ബുള്ളറ്റ് കമ്പനി നൽകിയിരുന്നത്. റൈഡര് മാനിയയുടെ 2022 പതിപ്പ് നവംബര് 18 മുതല് 20 വരെ ഗോവയില് വെച്ചാണ് റോയല് എന്ഫീല്ഡ് നടത്തിയത്. മൂന്ന് ദിവസത്തെ പരിപാടിയില് റോയല് എന്ഫീല്ഡ് നടത്തിയ പ്രധാന പ്രഖ്യാപനങ്ങളില് ഒന്നാണ് ഹിമാലയന്റെ പുതിയ മൂന്ന് കളർ ഓഫ്ഷനുകൾ.
പുതിയ മൂന്ന് നിറങ്ങൾ നൽകിയതോടൊപ്പം പഴയ മൂന്ന് കളർ ഓഫ്ഷനുകൾ കമ്പനി നിർത്തലാക്കുകയും ചെയ്തു. മിറാഷ് സില്വര്, ലേക്ക് ബ്ലൂ, റോക്ക് റെഡ് എന്നീ കളര് ഓപ്ഷനുകളാണ് കമ്പനി നിര്ത്തലാക്കിയത്. ഗ്രേവൽ ഗ്രേ, ഗ്രാനൈറ്റ് ബ്ലാക്ക്, പൈന് ഗ്രീന് എന്നിവ തുടർന്നു പോകും. ഹിമാലയത്തിന്റെ വൈവിധ്യമാര്ന്ന പ്രകൃതിയിൽ നിന്ന് പ്രചോദനം ഉള്ക്കൊണ്ടാണ് പുതിയ കളര് ഓപ്ഷനുകള് നൽകിയിരിക്കുന്നതെന്ന് കമ്പനി പറഞ്ഞു. ഇന്ത്യയിലെ അഡ്വഞ്ചര്-ഓഫ് റോഡ് ബൈക്ക് പ്രേമികളുടെ ഇഷ്ടക്കാരനായ ഹിമാലയന്റെ നിലവിലെ പ്രാരംഭ എക്സ്-ഷോറൂം വില 2.52 ലക്ഷം രൂപയാണ്.
പുതിയ കളർ ഓപ്ഷനുകൾ നൽകി എന്നല്ലാതെ മറ്റ് വ്യത്യാസങ്ങളൊന്നും ഹിമാലയനിൽ വരുത്തിയിട്ടില്ല. 6,500 ആർപിഎമ്മിൽ 24.3 ബിഎച്ച്പി പരമാവധി കരുത്തും 4,000-4,500 ആർപിഎമ്മിൽ 32 എൻഎം പീക്ക് ടോർക്കും ഉത്പാദിപ്പിക്കുന്ന 411 സിസി, എയർ കൂൾഡ്, എസ്ഒഎച്ച്സി മോട്ടോറാണ് ബുള്ളറ്റിന് കരുത്തേകുന്നത്. 5-സ്പീഡ് ഗിയർബോക്സാണ് വാഹനത്തിന്. 220 എംഎം ഗ്രൗണ്ട് ക്ലിയറൻസും ഡ്യുവൽ ചാനൽ സ്വിച്ചബിൾ എബിഎസും സ്റ്റാൻഡേർഡായി ഹിമാലയന് കമ്പനി വാഗ്ദാനം ചെയ്യുന്നു.
