മുംബൈ: വിദേശകാര്യമന്ത്രി എസ്. ജയശങ്കര്‍ ഇന്ന് മുംബൈയില്‍ യുഎഇ ഉപപ്രധാനമന്ത്രിയും വിദേശകാര്യമന്ത്രിയുമായ ഷെയ്ഖ് അബ്ദുള്ള ബിന്‍ സായിദ് അല്‍ നഹ്യാനുമായി കൂടിക്കാഴ്ച നടത്തും. ഇന്ത്യ-യുഎഇ ഉഭയകക്ഷി സഹകരണം ശക്തിപ്പെടുത്തുന്നതിനൊപ്പം പശ്ചിമേഷ്യയിലെ നിലവിലെ സാഹചര്യവും ചര്‍ച്ചയാകും. സൗദി അറേബ്യയ്‌ക്കു നേരെയുണ്ടായ സമീപകാല ആക്രമണങ്ങളും ചര്‍ച്ചയില്‍ വിഷയമായേക്കും. ഉഭയകക്ഷി സഹകരണത്തിന്റെ വിവിധ മേഖലകള്‍ വിലയിരുത്താനും പശ്ചിമേഷ്യയിലെ സ്ഥിതിഗതികള്‍ ചര്‍ച്ച ചെയ്യാനും ആഗോള, ബഹുരാഷ്‌ട്ര വിഷയങ്ങളില്‍ ആശയവിനിമയം നടത്താനും കൂടിക്കാഴ്ച അവസരമാകുമെന്ന് വിദേശകാര്യ മന്ത്രാലയ വക്താവ് രണ്‍ധീര്‍ ജയ്സ്വാള്‍ അറിയിച്ചു.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
ഇന്ത്യയുമായുള്ള ബന്ധം കൂടുതല്‍ ശക്തിപ്പെടുത്തുന്നതിനായി ഷെയ്ഖ് അബ്ദുള്ള ബിന്‍ സായിദ് അല്‍ നഹ്യാന്‍ ഇന്നലെ വൈകിട്ടാണ് മുംബൈയിലെത്തിയത്. മഹാരാഷ്‌ട്ര നൈപുണ്യ വികസന മന്ത്രി മംഗള്‍പ്രഭാത് ലോധ അദ്ദേഹത്തെ സ്വീകരിച്ചു. ഇന്ത്യയും യുഎഇയും തമ്മിലുള്ള സഹകരണം വ്യാപാരം, നിക്ഷേപം, ഊര്‍ജം തുടങ്ങി വിവിധ മേഖലകളില്‍ തുടരുന്നതിനിടെ നടക്കുന്ന കൂടിക്കാഴ്ചയ്‌ക്ക് പ്രാധാന്യമുണ്ട്. പശ്ചിമേഷ്യയിലെ സംഘര്‍ഷസാഹചര്യവും മേഖലയുടെ സുരക്ഷയുമായി ബന്ധപ്പെട്ട വിഷയങ്ങളും നേതാക്കള്‍ ചര്‍ച്ച ചെയ്യുമെന്നാണ് പ്രതീക്ഷ.
