ഗാന്ധിനഗർ : കോൺഗ്രസ് നേതാക്കൾ ഒരിക്കലും ഗാന്ധിയൻ മൂല്യങ്ങൾ പിന്തുടരാൻ ശ്രമിച്ചിട്ടില്ലെന്ന് പ്രധാനമന്ത്രി നരേന്ദ്ര മോദി . അതിനാൽ ഗുജറാത്തിലെ ഗ്രാമങ്ങൾ അവഗണിക്കപ്പെട്ടുവെന്നും അദ്ദേഹം പറഞ്ഞു. അഹമ്മദാബാദ് ജില്ലയിലെ ബാവ്ല ഗ്രാമത്തിൽ ബിജെപി സ്ഥാനാർഥികൾക്കായുള്ള പ്രചാരണ റാലിയിൽ സംസാരിക്കുകയായിരുന്നു അദ്ദേഹം.
ഇന്ത്യയുടെ ആത്മാവ് അതിന്റെ ഗ്രാമങ്ങളിലാണെന്ന് മഹാത്മാഗാന്ധി പറഞ്ഞിരുന്നു. എന്നാൽ ആ ഗാന്ധിയൻ മൂല്യങ്ങൾ പിന്തുടരാൻ കോൺഗ്രസിലെ നേതാക്കൾ ശ്രമിച്ചിട്ടില്ല. പകരം ആ ആത്മാവിനെ നശിപ്പിക്കുകയാണ് അവർ ചെയ്തത്. ഗ്രാമങ്ങളിലെ സാധ്യതകൾ അവർ തിരിച്ചറിഞ്ഞിട്ടില്ല. ഗ്രാമങ്ങൾ അവഗണിക്കപ്പെടുകയാണ് ഉണ്ടായതെന്നും അദ്ദേഹം കൂട്ടിച്ചേർത്തു.
ഗുജറാത്തിലെ പഞ്ചായത്തീരാജ് സംവിധാനത്തെ എല്ലാവരും അഭിനന്ദിക്കുന്നു. ബി.ജെ.പി അധികാരത്തിലെത്തിയ ശേഷം ഗ്രാമങ്ങളിൽ വലിയ മാറ്റങ്ങൾ കൊണ്ട് വന്നു. വൈദ്യുതിയും ടാപ്പ് വെള്ളവും ഉൾപ്പെടെയുള്ള അടിസ്ഥാന സൗകര്യങ്ങൾ വികസിപ്പിച്ചു. അതിനാൽ ജനങ്ങൾക്ക് സ്വന്തം നാട് വിട്ട് നഗരങ്ങളിലേക്ക് കുടിയേറേണ്ട അവസ്ഥ ഉണ്ടായിട്ടില്ലെന്നും പ്രധാനമന്ത്രി വ്യക്തമാക്കി.
