ചെന്നൈ: ഗർഭിണിയായ യുവതി വൈദ്യുതാഘാതമേറ്റ് മരിച്ചു. തമിഴ്നാട്ടിലെ തിരുപട്ടൂർ ടൗണിൽ വ്യാഴാഴ്ചയായിരുന്നു സംഭവം. പൂർണിമയെന്ന 25-കാരിയാണ് മരിച്ചത്. ഇവർ അഞ്ച് മാസം ഗർഭിണിയായിരുന്നു.
പശുത്തൊഴുത്ത് വൃത്തിയാക്കുന്നതിനിടെ ആയിരുന്നു അപകടം. തൊഴുത്ത് ശുചിയാക്കാൻ പോയ പൂർണിമ ഏറെ നേരം കഴിഞ്ഞിട്ടും തിരികെ വരാതായപ്പോൾ വീട്ടുകാർ ചെന്ന് അന്വേഷിക്കുകയായിരുന്നു. തുടർന്ന് തൊഴുത്തിൽ ഷോക്കേറ്റ് മരിച്ച നിലയിൽ കിടക്കുന്ന പൂർണിമയെയാണ് വീട്ടുകാർ കണ്ടത്.
ഉടൻ തന്നെ തിരുപട്ടൂർ പോലീസിനെ വീട്ടുകാർ വിവരമറിയിച്ചു. പോലീസെത്തി ഇൻക്വസ്റ്റ് നടപടികൾ പൂർത്തിയാക്കിയ ശേഷം മൃതദേഹം തിരുപട്ടൂർ സർക്കാർ ആശുപത്രിയിലേക്ക് പോസ്റ്റ്മോർട്ടത്തിനായി കൊണ്ടുപോയി. മരിച്ച പൂർണിമയ്ക്ക് ഭർത്താവും രണ്ട് വയസുള്ള മകനുമുണ്ട്.
