ജനാധിപത്യത്തിൽ എന്ത് ചെയ്യണമെന്ന് ഇന്ത്യയ്‌ക്ക് ആരും പറഞ്ഞുതരേണ്ടതില്ല; ഐക്യരാഷ്‌ട്രസഭയിൽ നിലപാട് വ്യക്തമാക്കി ഇന്ത്യ

ന്യൂഡൽഹി : ജനാധിപത്യത്തിൽ എന്ത് ചെയ്യണമെന്ന് ഇന്ത്യയ്‌ക്ക് ആരും പറഞ്ഞുതരേണ്ടതില്ലെന്ന് ഐക്യരാഷ്‌ട്രസഭയിലെ ഇന്ത്യയുടെ സ്ഥിരം പ്രതിനിധി രുചിര കാംബോജ്. ലോകത്തിലെ ഏറ്റവും പുരാതന നാഗരികസമൂഹങ്ങളിൽ ഒന്നാണ് രാജ്യം. ഇന്ത്യ എന്നും ജനാധിപത്യത്തിനാണ് മുൻഗണന നൽകുന്നത് എന്നും ലോകത്തിലെ ഏറ്റവും വലിയ ജനാധിപത്യ രാജ്യമാണെന്നും കാംബോജ് വ്യക്തമാക്കി.

ജനാധിപത്യത്തിന്റെ നെടും തൂണുകളായ നിയമ നിർമാണ സഭയും ഭരണ നിർവഹണ സംവിധാനവും നീതിന്യായ വ്യവസ്ഥയും നാലാം തൂണായ മാധ്യമങ്ങളും രാജ്യത്ത് നിലനിൽക്കുന്നുണ്ട്. വളരെ ഊർജ്ജസ്വലമായ സമൂഹമാദ്ധ്യമങ്ങളും രാജ്യത്തുണ്ട്. അതുകൊണ്ട് തന്നെ ലോകത്തെ ഏറ്റവും വലിയ ജനാധിപത്യ രാജ്യമാണ് ഇന്ത്യ.

ഓരോ അഞ്ച് വർഷത്തിലും ഞങ്ങൾ തിരഞ്ഞെടുപ്പ് നടത്തുന്നുണ്ട്. ഓരോരുത്തർക്കും അവരവരുടെ ഇഷ്ടം തുറന്ന് പറയാൻ സ്വാതന്ത്ര്യമുണ്ട്. അങ്ങനെയാണ് നമ്മുടെ രാജ്യം പ്രവർത്തിക്കുന്നത്. അത് അതിവേഗം പരിഷ്‌കരിക്കുകയും രൂപാന്തരപ്പെടുകയും ചെയ്യുന്നു. ഇത് എല്ലാവരും അംഗീകരിക്കുന്നുണ്ടെന്നും കാംബോജ് പറഞ്ഞു.