പന്തളം : കാലിന് സ്വാധീനം ഇല്ലാത്ത അയ്യപ്പ ഭക്തനെ ചുമലിലേറ്റി പോകുന്ന പോലീസ് ഉദ്യോഗസ്ഥന്റെ ചിത്രം സമൂഹ മാദ്ധ്യമങ്ങളിൽ വൈറൽ ആകുന്നു. ദേവസ്വം താൽക്കാലിക സെക്യൂരിറ്റി ഉദ്യോഗസ്ഥൻ ആയി ജോലി നോക്കുന്ന കൊല്ലം സ്വദേശി ബിജു കുമാർ ആണ് അയ്യപ്പ ഭക്തനെ തോളിലേറ്റി ദർശനത്തിനെത്തിച്ചത്. പ്രമുഖർ അടക്കം ബിജുവിന്റെ ചിത്രം സമൂഹ മാദ്ധ്യമങ്ങളിൽ പങ്കു വെച്ചിട്ടുണ്ട്
തിരക്കേറിയ വഴിയിലൂടെ ഒരു അയ്യപ്പ ഭക്തനെയും തോളിലേറ്റി പോകുന്ന പോലീസുകാരനെ ശ്രദ്ധയിൽ പെട്ടതോടെ കണ്ടു നിന്ന ഭക്തർ ആണ് ഈ ചിത്രം എടുത്ത് സമൂഹ മാദ്ധ്യമങ്ങളിൽ പോസ്റ്റ് ചെയ്തത്. ഇതോടെ ഈ ചിത്രം ദേശങ്ങൾ കടന്നു യാത്ര ചെയ്തു. കൊല്ലം ദേവസ്വം ഗാർഡായാണ് അദ്ദേഹം ജോലി ചെയ്യുന്നത്.
പ്രമുഖർ അടക്കം ബിജു ചെയ്ത സേവനത്തെ കുറിച്ച് സമൂഹ മാധ്യമങ്ങളിൽ കുറിപ്പുകൾ ഇട്ടു. എല്ലാ അയ്യപ്പ സ്വാമിയുടെ അനുഗ്രഹം മാത്രം എന്നാണ് ബിജു വിന്റെ മറുപടി.
കഴിഞ്ഞ 27 ന് ഡ്യൂട്ടിയിലായിരിക്കെയാണ് സംഭവം നടന്നത്. രണ്ട് കാലിനും സ്വാധീനമില്ലാതെ അയ്യപ്പ ഭക്തൻ കൈകൾ തറയിൽ കുത്തി വരുന്നത് കണ്ടു. ചോദിച്ചപ്പോൾ ആന്ധ്ര ചിറ്റൂരിൽ നിന്ന് വരികയാണെന്നാണ് പറഞ്ഞു. സ്വാമിയുടെ കഷ്ടപ്പാട് കണ്ടപ്പോൾ സഹായിക്കാതിരിക്കാൻ തോന്നിയില്ല. തുടർന്ന് മറ്റുള്ളവരുടെ സഹായത്തോടെ സ്വാമിയെ തോളിൽ കയറ്റി സന്നിധാനത്ത് എത്തിക്കുകയായിരുന്നു. അര മണിക്കൂർ നേരം കൊണ്ട് സന്നിധാനത്തെത്തി. തുടർന്ന് അവിടെ പോലീസുകാരുടെ അടുത്ത് ആക്കിയ ശേഷമാണ് മടങ്ങിയത് എന്നും ബിജു പറയുന്നു.
ചിത്രം വൈറൽ ആയതോടെ ഒരുപാട് ആളുകൾ തിരിച്ചറിയുന്നു, അതിൽ എല്ലാം ഏറെ സന്തോഷം. അതിനെല്ലാം ഉപരിയായി ഭഗവൽ സന്നിധിയിൽ ഏൽപ്പിച്ച ജോലിയിലെ തിരക്കിലാണ് ഇദ്ദേഹം.
24 വർഷത്തെ സൈനിക ജീവിതത്തിനു ശേഷം വിരമിച്ച ഇദ്ദേഹം ഇടപ്പള്ളി ട്രാഫിക് സ്റ്റേഷനിൽ ഹോംഗാർഡാണ്. ഇവിടെ നിന്നും ലീവ് എടുത്ത് ആണ് ശബരിമല ഡ്യൂട്ടിക്കായി എത്തിയത്. ഇതു പോലെ അനേകം ബിജുമാരുണ്ട്, ആരും അറിയാതെ അയ്യന്റെ സന്നിധിയിൽ തീർത്ഥാടകർക്ക് കരുത്തും കരുതലും ആകുന്നവർ.
Comments