തിരുവനന്തപുരം: അഴിമതിക്കാരിയായ മേയർ ആര്യ രാജേന്ദ്രൻ രാജി വെക്കുന്നത് വരെ സമരം തുടരുമെന്ന് ബിജെപി. മേയറുടെ രാജി ആവശ്യപ്പെട്ട് തിരുവനന്തപുരം കോർപ്പറേഷൻ ഓഫീസിലേക്ക് യുവമോർച്ച നടത്തിയ മാർച്ച് പോലീസ് തടഞ്ഞു. മാർച്ചിന് നേരെ പോലീസ് മൂന്ന് വട്ടം ജലപീരങ്കി പ്രയോഗിച്ചു.
മേയറുടെ രാജി അവശ്യപ്പെട്ട് ജനുവരി രണ്ട് മുതൽ അഞ്ച് വരെ നഗരസഭയിൽ യുവമോർച്ച- മഹിളാമോർച്ച സംഘടനകളുടെ നേതൃത്വത്തിൽ പ്രക്ഷോഭ പരിപാടികൾ സംഘടിപ്പിക്കും. ജനുവരി 6ന് നഗരസഭ വളഞ്ഞ് പ്രതിഷേധിക്കും. ജനുവരി 7ന് തിരുവനന്തപുരം നഗരപരിധിയിൽ ബിജെപി ഹർത്താൽ ആചരിക്കുമെന്നും പാർട്ടി നേതാവ് വി വി രാജേഷ് അറിയിച്ചു.
കോർപ്പറേഷനിൽ അഴിമതിയും സ്വജനപക്ഷപാതവും ഉൾപ്പെടെയുള്ള കാര്യങ്ങൾ നടക്കുന്നുണ്ടെന്ന് മന്ത്രിമാർ ഉൾപ്പെടെ സമ്മതിക്കുന്നു. വളരെ അപകടകരമായ അവസ്ഥയിലൂടെയാണ് തിരുവനന്തപുരം കടന്ന് പൊയ്ക്കൊണ്ടിരിക്കുന്നത്. വിഷയം പൊതുസമൂഹത്തിന് മുന്നിൽ വെക്കുകയാണ്. ജനങ്ങൾ തീരുമാനമെടുക്കട്ടെയെന്നും വി വി രാജേഷ് പറഞ്ഞു.
മെഡിക്കൽ കോളേജിൽ ഉൾപ്പെടെ നടക്കുന്ന ബന്ധുനിയമനങ്ങൾ വെളിച്ചത്ത് കൊണ്ടു വരുമെന്നും ബിജെപി നേതാക്കൾ വ്യക്തമാക്കി.
Comments