സിനിമാ പ്രേമികൾ ആകാംക്ഷയോടെ കാത്തിരിക്കുന്ന ചിത്രമാണ് മമ്മൂട്ടിയെ നായകനാക്കി ലിജോ ജോസ് പെല്ലിശ്ശേരി സംവിധാനം ചെയ്ത ‘നൻപകൽ നേരത്ത് മയക്കം’. 27-ാമത് കേരള രാജ്യാന്തര ചലച്ചിത്രമേളയിൽ പ്രദർശിപ്പിച്ച ചിത്രത്തിന് മികച്ച അഭിപ്രായമാണ് ലഭിച്ചത്. സിനിമ തിയറ്റുകളിൽ കാണാനുള്ള തിടുക്കത്തിലാണ് മലയാള സിനിമാ പ്രേമികൾ. ഇപ്പോഴിതാ, ക്രിസ്തുമസ് ദിനത്തോടനുബന്ധിച്ച് ചിത്രത്തിന്റെ ട്രെയിലർ പുറത്തു വിട്ടിരിക്കുകയാണ് അണിയറ പ്രവർത്തകർ.
‘നൻപകൽ നേരത്ത് മയക്കം’ എന്ന ലിജോ ചിത്രം ഗംഭീര സിനിമാനുനുഭവം ഉറപ്പു നൽകുമെന്ന് അടിവരയിടുന്ന ട്രെയിലറാണ് പുറത്തു വന്നിരിക്കുന്നത്. മമ്മൂട്ടിയുടെ അത്ഭുതപ്പെടുത്തുന്ന അഭിനയ രംഗങ്ങൾ കൊണ്ട് നിറഞ്ഞതായിരിക്കും ചിത്രം. മമ്മൂട്ടി കമ്പനിയുടെ യൂട്യൂബ് ചാനലിലൂടെയാണ് ട്രെയിലർ റിലീസ് ചെയ്തിരിക്കുന്നത്. ട്രെയിലറിന്റെ കമന്റ് ബോക്സ് ആരാധകരുടെയും സിനിമാ പ്രേമികളുടെയും അഭിപ്രായങ്ങൾ കൊണ്ട് നിറയുകയാണ്.
ക്ലീൻ U ചലച്ചിത്രമാണ് ‘നൻപകൽ നേരത്ത് മയക്കം’. മമ്മൂട്ടി കമ്പനി എന്ന പേരിൽ മമ്മൂട്ടി തന്നെയാണ് ചിത്രം നിർമ്മിച്ചിരിക്കുന്നത്. സിനിമയുടെ ചിത്രീകരണം പൂർണമായും തമിഴ്നാട്ടിലായിരുന്നു. മലയാളത്തിലും തമിഴിലുമായാണ് സിനിമ ഒരുക്കിയത്. രണ്ട് ഭാഷകളിലെയും പുതിയ താരങ്ങളാണ് അഭിനേതാക്കളായി എത്തിയത്. ഒപ്പം അശോകനും ഒരു പ്രധാന വേഷം ചെയ്യുന്നു. പേരൻപിനും പുഴുവിനും ക്യാമറ ചലിപ്പിച്ച തേനി ഈശ്വരാണ് ഛായാഗ്രഹണം.
