കൗമാരപ്രായം മുതൽ എല്ലാവരും നേരിടുന്ന പ്രശ്‌നമാണ് മുഖക്കുരു. ലിംഗഭേദ വ്യത്യാസമില്ലാതെ എല്ലാവരുടെയും മുഖത്ത് കുരു വരാറുണ്ട്. പലവിധ കാരണങ്ങളാൽ ഇതു സംഭവിക്കാം. ജനിതകമായ പ്രത്യേകതകൾ, ഭക്ഷണക്രമീകരണങ്ങൾ, സമ്മർദ്ദം, ഹോർമോൺ വ്യത്യാസങ്ങൾ, അണുബാധ എന്നിവയെല്ലാം മുഖക്കുരുവിന് കാരണമാകും. മുഖക്കുരു ശല്യം രൂക്ഷമായാൽ ഡോക്ടറെ കാണുന്നതാണ് ഏറ്റവും ഉചിതമായ പോംവഴി. എന്നാൽ ചില വീട്ടുവൈദ്യങ്ങൾ കൊണ്ടും ഒരു പരിധി വരെ മുഖക്കുരു മാറ്റാം..
തേനും കറുവട്ടപ്പട്ടയും ഉപയോഗിച്ച് പേസ്റ്റ് ഉണ്ടാക്കി പുരട്ടുന്നത് മുഖക്കുരു മാറാൻ നല്ലതാണെന്ന് ആരോഗ്യവിദഗ്ധർ പറയുന്നു. ഇതിനായി ചെയ്യേണ്ടത് ഇത്രമാത്രം..
രണ്ട് ടേബിൾ സ്പൂൺ തേനിൽ ഒരു ടേബിൾ സ്പൂൺ കറുവപ്പട്ട പൊടിച്ചത് ചേർത്ത് പേസ്റ്റ് തയ്യാറാക്കുക. മുഖം വൃത്തിയായി കഴുകയതിന് ശേഷം ഈ പേസ്റ്റ് മാസ്‌ക് രൂപത്തിൽ പുരട്ടുക. 15 മിനിറ്റ് കഴിയുമ്പോൾ കഴുകി കളയാവുന്നതാണ്. ഇത് ദിവസവും ചെയ്താൽ മുഖക്കുരു ശല്യത്തിന് മാറ്റം വരും.
തേൻ-കറുവപ്പട്ട പേസ്റ്റ് മുഖത്ത് പുരട്ടുന്നതിന് മുമ്പ് അലർജി പരിശോധന നടത്തേണ്ടതാണ്. നിരവധിയാളുകൾക്ക് കറുവപ്പട്ട ചർമ്മത്തിൽ അലർജി വരുത്താറുണ്ട്. അതിനാൽ തയ്യാറാക്കി വച്ചിരിക്കുന്ന പേസ്റ്റ് ആദ്യം കൈകളിൽ പുരട്ടി നോക്കുക. അലർജിയില്ലെന്ന് ഉറപ്പുവരുത്തിയതിന് ശേഷം മുഖത്ത് പുരട്ടാം.
