കൊച്ചി നഗരത്തിൽ തോന്നുംപോലെ പാഞ്ഞ് സ്വകാര്യ ബസുകൾ; പൂട്ടിടാൻ മോട്ടോർവാഹന വകുപ്പ്

എറണാകുളം: കൊച്ചിയിൽ സ്വകാര്യ ബസുകളുടെ നിയമ ലംഘനങ്ങൾക്കെതിരെ നടപടി കടുപ്പിക്കാനൊരുങ്ങി മോട്ടോർ വാഹന വകുപ്പ്. നിയമ ലംഘനം കണ്ടെത്താൻ പ്രത്യേക എൻഫോഴ്‌സ്‌മെന്റ് ടീമിനെ വിന്യസിച്ചു. സ്വകാര്യ ബസുകളുടെ നിയമ ലംഘനം നഗരത്തിൽ വലിയ ഗതാഗതക്കുരുക്കിന് കാരണമാകുന്നുവെന്ന കണ്ടെത്തലിനെ തുടർന്നാണ് നടപടി.

പുതുവത്സര ആഘോഷവും ബിനാലെയും ഒക്കെയായതോടെ നഗരത്തിൽ തിരക്ക് കൂടി. ഇതിനിടയിൽ സ്വകാര്യ ബസുകളുടെ നിയമ ലംഘനം വലിയ ഗതാഗത കുരുക്കിന് കാരണമാകുന്നെന്നാണ് മോട്ടോർ വാഹന വകുപ്പിന്റെ കണ്ടെത്തൽ. തുടർന്ന് ഗതാഗത നിയമം ലംഘിക്കുന്ന സ്വകാര്യ ബസുകൾക്കെതിരെ കർശന നടപടി സ്വീകരിക്കാൻ ജോയിന്റ് ആർ.ടി.ഒ നിർദ്ദേശം നൽകി.

വരും ദിവസങ്ങളിലെ ഇത്തരം നിയമ ലംഘനങ്ങൾ കണ്ടെത്താൻ പ്രത്യേക എൻഫോഴ്‌സ്‌മെൻറ് ടീം നിരത്തിലുണ്ടാകും. ചെറിയ വാഹനങ്ങൾക്ക് മാത്രം പ്രവേശം അനുവദിച്ചിരിക്കുന്ന ഇടങ്ങളിലൂടെ സ്വകാര്യ ബസുകൾ കയറ്റി മറ്റു ബസുകളെ ഓവർ ടേക്ക് ചെയ്യുന്നവർക്കെതിരെയും നടപടി ഉണ്ടാകും . പിഴയ്‌ക്ക് പുറമേ നിയമലംഘകരെ കണ്ടെത്തി കർശന നടപടിക്ക് ജില്ല കലക്ടർ അധ്യക്ഷനായ ആർ.ടി.ഒ ബോർഡിലേക്കും ശുപാർശ ചെയ്യും. നിയമ ലംഘനങ്ങൾ ആവർത്തിക്കുന്നവരുടെ ലൈസൻസും പെർമിറ്റും ഉൾപ്പെടെ റദ്ദാക്കുന്നതടക്കമുള്ള നടപടികളിലേക്കാകും കടക്കുക.