കണ്ണൂർ – എസ്എൻ കോളേജിലെ ഇൻഡോർ സ്റ്റേഡിയത്തിന്റെ ഉദ്ഘാടന ചടങ്ങിൽ ഗുരുസ്തുതി ചൊല്ലിയപ്പോൾ മുഖ്യമന്ത്രി പിണറായി വിജയൻ എഴുന്നേൽക്കാതിരുന്നതിന് പിന്നാലെ ഉടലെടുത്ത വിവാദത്തിൽ പ്രതികരിച്ച് സിപിഎം നേതാവും കണ്ണൂർ ജില്ലാ സെക്രട്ടറിയുമായ എംവി ജയരാജൻ. കോളേജിലെ പരിപാടിയിൽ ചൊല്ലിയത് പ്രാർത്ഥനയല്ലെന്നാണ് ജയരാജൻ പറയുന്നത്. മുഖ്യമന്ത്രി എഴുന്നേൽക്കേണ്ട ആവശ്യമില്ലെന്ന് വെളളാപ്പള്ളി നടേശൻ പറഞ്ഞുവെന്നും ജയരാജൻ അറിയിച്ചു.
പ്രാർത്ഥനയ്ക്കായുള്ള അറിയിപ്പ് മുഴങ്ങിയപ്പോൾ എഴുന്നേൽക്കാനൊരുങ്ങിയ മുഖ്യമന്ത്രി ഗുരുവന്ദനമാണെന്ന് അറിഞ്ഞതോടെ അവിടെ ഇരിക്കുകയായിരുന്നു. തൊട്ടടുത്ത് ഉണ്ടായിരുന്ന രാമചന്ദ്രൻ കടന്നപ്പള്ളി എംഎൽഎ എഴുന്നേൽക്കാനൊരുങ്ങിയെങ്കിലും അദ്ദേഹത്തെ മുഖ്യമന്ത്രി വിലക്കുകയായിരുന്നു. ഇതിന്റെ വീഡിയോ സമൂഹമാദ്ധ്യമങ്ങളിൽ പ്രചരിച്ചതോടെയാണ് സംഭവം വിവാദമായത്.
ഗുരുർബ്രഹ്മാ ഗുരുർവിഷ്ണുഃ എന്ന ഗുരുഗീതമാണ് വേദിയിൽ ചൊല്ലിയത്. ഈ സമയത്ത് വേദിയിലും സദസ്സിലുമുണ്ടായിരുന്ന എല്ലാവരും എഴുന്നേറ്റുനിന്നു.
ഈ സംഭവം വിവാദമായതോടെ മുഖ്യമന്ത്രി മാപ്പു പറയണമെന്ന ആവശ്യവുമായി നിരവധി പേർ രംഗത്തെത്തി. ഗുരുനിന്ദ നടത്തിയ മുഖ്യമന്ത്രി പിണറായി വിജയൻ തനിനിറം വ്യക്തമാക്കിയെന്ന് വിദേശകാര്യസഹമന്ത്രി വി.മുരളീധരൻ പറഞ്ഞു.
Comments