കൊറിയൻ വാഹന നിർമ്മാതാക്കളായ കിയയുടെ കാറുകൾക്ക് ഇന്ത്യൻ വിപണിയിൽ ആരാധകരേറെയാണ്. സ്റ്റൈലിഷ് ലുക്ക് കൊണ്ടും പെർഫോമൻസ് കൊണ്ടും കിയയുടെ മോഡലുകൾ വാഹനപ്രേമികളുടെ മനസ്സ് കീഴടക്കും. ഇപ്പോഴിതാ, കിയയുടെ മൂന്നുനിര സീറ്റ് വാഹനമായ സൊറെന്റോ എസ്‌യുവി 2023 ഓട്ടോ എക്സ്പോയിൽ അരങ്ങേറ്റം കുറിക്കും എന്ന് അറിയിച്ചിരിക്കുകയാണ് നിർമ്മാതാക്കൾ. 2020-ൽ ആഗോള വിപണിയിൽ അരങ്ങേറിയ നാലാം തലമുറ വാഹനമാണ് ഈ വർഷം ഇന്ത്യയിൽ എത്തുന്നത്. ഹ്യുണ്ടായ് സാന്റാഫേ മോഡലിന് സമാനമാണ് കിയ സൊറെന്റോ.
വാഹനം ഉടൻ ഇന്ത്യയിൽ അവതരിപ്പിക്കുമെങ്കിലും വിപണിയിൽ എത്തുന്നത് എന്നാണെന്ന് കമ്പനി അറിയിച്ചിട്ടില്ല. കമ്പനിയുടെ മറ്റ് വാഹനങ്ങളുടെ രൂപത്തോട് വളരെയധികം സമാനതകളുള്ള ഡിസൈൻ തന്നെയാണ് സൊറെന്റോയ്‌ക്കും കിയ നൽകിയിരിക്കുന്നത്. ടൈഗർ നോസ് ഗ്രിൽ, 3 പോഡ് എൽഇഡി ഹെഡ്‌ലാംപ്, ടൈഗർ ഐലൈൻ ഡേടൈം റണ്ണിംഗ് ലാംപുകൾ എന്നിവയാണ് വാഹനത്തിന്റെ മുൻഭാഗം ആകർഷണീയമാക്കുന്നത്. സോണെറ്റിനെ അനുസ്മരിപ്പിക്കുന്ന വിധത്തിലാണ് വാഹനത്തിന്റെ ഇന്റീരിയർ. 10.25 ഇഞ്ച് സെൻട്രൽ ഇൻഫോടെയ്ൻമെന്റ് സംവിധാനം, വെർട്ടിക്കൽ എസി വെന്റുകൾ, തൊട്ടുതാഴെയായി എയർ കണ്ടീഷനിംഗ് സംവിധാനത്തിന്റെ കൺട്രോൾ നിര എന്നിവ വാഹനത്തിന് നൽകിയിരിക്കുന്നു.
64 കളർ ആംബിയന്റ് ലൈറ്റിംഗ്, പനരോമിക് സൺറൂഫ്, 360 ഡിഗ്രി ക്യാമറ, 12 സ്പീക്കറുകളോടു കൂടിയ ശബ്ദ സംവിധാനം എന്നിവയും വാഹനത്തിലുണ്ട്. 1.6 ലീറ്റർ ടർബോ പെട്രോൾ – ഹൈബ്രിഡ് എൻജിനായിരിക്കും വാഹനത്തിന്. 44.2കിലോവാട്ട് കരുത്തുള്ള ഇലക്ട്രിക് മോട്ടർ 230 എച്ച്പി കരുത്തും 350 എൻഎം ടോർക്കും ഉൽപാദിപ്പിക്കും. 6 സ്പീഡ് ഓട്ടമാറ്റിക് ട്രാൻസ്മിഷനാണ് സൊറെന്റോയ്‌ക്ക്. ഹൈബ്രിഡ് ഇല്ലാത്ത കരുത്ത് കൂടിയ കംബസ്റ്റ്യൻ മോഡലും വാഹനത്തിൽ ഉണ്ടാകും. 2.5 ലീറ്റർ ടർബോ പെട്രോൾ എൻജിൻ 191 എച്ച്പി കരുത്തും 246 എൻഎം ടോർക്കും ഉത്പാദിപ്പിക്കും.
