കൊല്ലം: ആയൂരിൽ മദ്യപസംഘത്തിന്റെ മർദ്ദനമേറ്റയാൾ തൂങ്ങി മരിച്ച നിലയിൽ. കൊല്ലം സ്വദേശി അജയകുമാറാണ് ആത്മഹത്യ ചെയ്തത്. മകളോട് മോശമായി പെരുമാറിയത് ചോദ്യം ചെയ്തതിനാണ് അജയകുമാറിന് മർദ്ദനം ഏൽക്കുന്നത്. ഇതില്ഡ# മനം നൊന്തായിരുന്നു ആത്മഹത്യയെന്ന് ബന്ധുക്കൾ പരാതിപ്പെട്ടു.
ബുധനാഴ്ച വൈകുന്നേരമാണ് സംഭവം. അജയകുമാർ പ്ലസ് വൺ വിദ്യാർത്ഥിയായ മകളെ ട്യൂഷൻ ക്ലാസിൽ നിന്നും വിളിച്ചുകൊണ്ട് വരുകയായിരുന്നു. വഴിയിൽ മദ്യപിച്ചുകൊണ്ടു നിന്ന നാലംഗ സംഘം മകളോട് മോശമായി സംസാരിച്ചു. മകളെ വീട്ടിൽ എത്തിച്ച ശേഷം ഇത് ചോദ്യം ചെയ്യാനെത്തിയ അജയകുമാറിനെ മദ്യപ സംഘം മർദ്ദിക്കുകയായിരുന്നു. മർദ്ദനത്തിനിടയിൽ അജയകുമാറിനെ വിവസ്ത്രനാക്കി അപമാനിക്കുകയും ചെയ്തു. ഇതിൽ മനംനൊന്താണ് അജയകുമാർ ആത്മഹത്യ ചെയ്തതെന്ന് ബന്ധുക്കൾ പറയുന്നു.
കഴിഞ്ഞ ദിവസം സംസ്കാര ചടങ്ങ് നടത്തി. തുടർന്ന് ഇന്ന് കുടുംബം പോലീസിൽപരാതി നൽകുകയായിരുന്നു. സംഭവത്തിൽ അന്വേഷണം ആരംഭിച്ചതായി പോലീസ് വ്യക്തമാക്കി.
