വിശ്രമകാലത്ത് മികച്ച ഒരു വരുമാനമാർഗം കൂടി ലഭിക്കുന്നതിന് വേണ്ടിയുള്ള കേന്ദ്ര സർക്കാർ പദ്ധതിയാണ് പ്രധാൻ മന്ത്രി വയ വന്ദന യോജന അഥവാ പിഎംവിവിവൈ. 2020 മെയ് മാസത്തിലാണ് പദ്ധതി പ്രഖ്യാപിച്ചത്. ലൈഫ് ഇൻഷുറൻസ് കോർപ്പറേഷൻ ഓഫ് ഇന്ത്യയാണ് ഈ പെൻഷൻ പദ്ധതി നടപ്പാക്കുന്നത്.
പത്ത് വർഷം മുടങ്ങാതെ പണമടച്ചാൽ ഈ പദ്ധതി വഴി 7.40 % വാർഷിക നിരക്കിൽ പെൻഷൻ ലഭിക്കും. 60 വയസ് കഴിഞ്ഞാലാണ് പെൻഷൻ തുക ലഭിച്ച് തുടങ്ങുക. 15 ലക്ഷം രൂപ വരെയാണ് നിക്ഷേപ പദ്ധതി. മികച്ച പലിശ വാഗ്ദാനം ചെയ്തിരുന്ന ഒരു റിട്ടയർമെന്റ് പദ്ധതികൂടിയാണിത്. കേന്ദ്ര സർക്കാർ ജീവനക്കാർ, സംസ്ഥാന സർക്കാർ ജീവനക്കാർ എന്നിവർ അല്ലാത്തവർക്ക് പ്രതിമാസ പെൻഷൻ പദ്ധതിയിൽ ചേരാം.
വാർഷിക പെൻഷൻ വേണ്ടവർക്ക് പദ്ധതിയിൽ നിക്ഷേപിക്കേണ്ട ഏറ്റവും കുറഞ്ഞ തുക 1,56,658 രൂപയാണ്. പ്രതിമാസത്തിലാണ് പെൻഷൻ വേണ്ടതെങ്കിൽ നിക്ഷേപിക്കേണ്ട ഏറ്റവും കുറഞ്ഞ തുക 1,62,162 രൂപയാണ്. പത്ത് വർഷത്തേക്ക് പെൻഷൻ ലഭിക്കുന്ന പദ്ധതിയാണ് ഇത്. ഇത് പ്രകാരം ലഭിക്കുന്ന കുറഞ്ഞ പെൻഷൻ 1000 രൂപയാണ്. എത്ര രൂപ പെൻഷൻ വേണം എന്നതനുസരിച്ച് നിക്ഷേപവും കൂട്ടാം. വയ വന്ദന യോജനയിൽ പരമാവധി നിക്ഷേപമായ 15 ലക്ഷം രൂപ നിക്ഷേപിക്കുന്ന വ്യക്തിക്ക് പ്രതിമാസം 9,250 രൂപ പെൻഷനായി ലഭിക്കും. പത്ത് വർഷത്തെ കാലാവധി അവസാനിച്ചാൽ അവസാന പെൻഷൻ ഗഡുവിനൊപ്പം നിക്ഷേപിച്ച തുക കൂടി തിരികെ ലഭിക്കും. 2023 മാർച്ച് 31 ആണ് പദ്ധതിയിൽ ചേരാനുള്ള അവസാന ദിവസം.
പത്ത് വർഷ കാലാവധിയിലുള്ള പദ്ധതിയിൽ നടത്തുന്ന തുടർച്ചയായ നിക്ഷേപം കാലാവധി പൂർത്തിയാകുമ്പോൾ നിക്ഷേപകർക്ക് തിരികെ ലഭിക്കും. അതിനിടയിൽ മരണം സംഭവിച്ചാൽ ഇൻഷുറൻസ് തുക നോമിനിക്ക് ലഭിക്കും. അതേ സമയം, നിക്ഷേപം മൂന്ന് വർഷം പൂർത്തിയാക്കിയാൽ തുകയുടെ 75 ശതമാനം വായ്പയെടുക്കാൻ സാധിക്കും. പലിശ നിരക്കി ഓരോ വർഷവും പുതുക്കി നിശ്ചയിക്കും. സമാനമായി പോളിസി ഉടമയ്ക്കോ ജീവിത പങ്കാളിക്കോ മാരകമായ രോഗങ്ങൾ ഉണ്ടായാൽ തുകയുടെ 98 ശതമാനം സറണ്ടർ ചെയ്യാനാകും.
