കേരളത്തിലെ ആദ്യ ട്രാൻസ്മാൻ ബോഡി ബിൽഡർക്ക് കൂട്ടായി മിസ് മലബാർ. ട്രാൻസ്ജെൻഡറുകളായ പ്രവീൺ നാഥും റിഷാന ഐഷുവും പ്രണയ ദിനത്തിൽ പാലക്കാട് വിവാഹിതരായി. കുടുംബാഗങ്ങളുടെയും സുഹൃത്തുക്കളുടയെും സാന്നിധ്യത്തിലായിരുന്നു ചടങ്ങുകൾ.
ബോഡി ബിൽഡിംഗ് താരമായ പ്രവീൺ 2021-ൽ ട്രാൻസ്ജെൻഡർ വിഭാഗത്തിൽ മിസ്റ്റർ കേരളയായിരുന്നു. 2022-ൽ മുംബൈയിൽ നടന്ന രാജ്യാന്തര ബോഡി ബിൽഡിംഗ് ഫൈനലിൽ മത്സരിച്ചു.മലപ്പുറം കോട്ടക്കൽ സ്വദേശിയായ റിഷാന ട്രാൻസ്ജെൻഡർ വ്യക്തികൾക്കുള്ള മിസ് മലബാർ പട്ടം സ്വന്തമാക്കിയിട്ടുണ്ട്. . തൃശൂരിലെ സ്വകാര്യ സ്ഥാപനത്തിലെ ജോലിയ്ക്കൊപ്പം മോഡലിംഗ് രംഗത്തും സജീവമാണ് റിഷാന.
മഹാരാജാസ് കോളേജിലായിരുന്നു പ്രവീൺ പഠിച്ചത്. ട്രാൻസ് വിഭാഗത്തിനായി സഹയാത്രിക സംഘടന നടത്തിയ പരിപാടിയ്ക്കിടെയാണ് റിഷാന ഐഷുവുമായി പരിചയത്തിലാകുന്നത്. പിന്നീട് ഇരുവരും പ്രണയം തുറന്ന് പറയുകയായിരുന്നു. ആൺ ശരീരത്തിലേക്കുള്ള യാത്ര ഏറെ പ്രയാസം നിറഞ്ഞതായിരുന്നു പ്രവീണിന്. പല തവണ ആത്മഹത്യയുടെ വക്കിലെത്തിയപ്പോഴും ആത്മവിശ്വാസവും നിശ്ചയദാർഢ്യവുമാണ് തന്നെ കരകയറ്റിയതെന്ന് പ്രവീൺ പറഞ്ഞിരുന്നു.
മുസ്ലീം കുടുംബത്തിൽ ജനിച്ച ഐഷുവിന്റെ കാര്യവും ദുഷ്കരമായിരുന്നു. ട്രാൻസ് ഐഡിന്റിറ്റി അംഗീകരിക്കാൻ കുടുംബം തയ്യാറായിരുന്നില്ല. പോരാട്ടങ്ങൾക്കൊടുവിൽ ഐഷുവിന്റെ കുടുംബം എല്ലാം തിരിച്ചറിയുകയും അംഗീകരിക്കുകയും ചെയ്തു. രണ്ട് വർഷത്തെ സൗഹൃദമാണ് വിവാഹത്തിലെത്തിയത്.
