സരസ്വതി ദേവി അദ്ദേഹത്തെ അനുഗ്രഹിച്ചിട്ടുണ്ട്; പാകിസ്താനിൽ ജാവേദ് അക്തർ നടത്തിയ പരാമർശത്തെ പ്രശംസിച്ച് കങ്കണ

ന്യൂഡൽഹി: കവിയും ഗാനരചയിതാവുമായ ജാവേദ് അക്തറിനെ അഭിനന്ദിച്ച് നടി കങ്കണ റണാവത്ത്. പാകിസ്താനിൽ അടുത്തിടെ നടന്ന പരിപാടിയിൽ ഇദ്ദേഹം നടത്തിയ പരാമർശത്തെയാണ് കങ്കണ പ്രശംസിച്ചത്. 26/11 ലെ മുംബൈ ഭീകരാക്രമണത്തിന്റെ കുറ്റവാളികൾ ഇപ്പോഴും പാകിസ്താനിൽ സ്വതന്ത്രമായി വിഹരിക്കുകയാണെന്ന കാര്യം ഇന്ത്യക്കാർ മറന്നിട്ടില്ലെന്നാണ് അദ്ദേഹം പറഞ്ഞത്. ഈ പരാമർശത്തെ പ്രശംസിച്ച് കൊണ്ടാണ് കങ്കണ ട്വീറ്റ് ചെയ്തത്.

“ജാവേദ് സാബിന്റെ കവിതകൾ കേൾക്കുമ്പോഴെല്ലാം സരസ്വതി ദേവി അദ്ദേഹത്തെ അനുഗ്രഹിച്ചിട്ടുണ്ടെന്ന് എനിക്ക് തോന്നുന്നു. എന്നാൽ ഒരു വ്യക്തിയുടെ ഉള്ളിൽ ദൈവികത കുടികൊള്ളണമെങ്കിൽ അയാളുടെ ഉള്ളിൽ സത്യം ഉണ്ടായിരിക്കണം.”- കങ്കണ റണാവത്ത് ട്വീറ്റ് ചെയ്തു.

ചൊവ്വാഴ്ച കങ്കണ റീട്വീറ്റ് ചെയ്ത ക്ലിപ്പിൽ ജാവേദ് അക്തർ പറയുന്നത് ഇങ്ങനെയാണ്, “മുംബൈയിലെ 26/11 ആക്രമണത്തിന്റെ ഭീകരത ഇന്ത്യക്കാർ മറന്നിട്ടില്ല. ആ ആക്രമണങ്ങളുടെ കുറ്റവാളികൾ ഇപ്പോഴും പാകിസ്ഥാനിൽ സ്വതന്ത്രമായി ജീവിക്കുന്നു.” പാകിസ്താനി കലാകാരന്മാരായ നുസ്രത്ത് ഫത്തേ അലി ഖാനും, മെഹ്ദി ഹസനും വേണ്ടി ഇന്ത്യ വലിയ പരിപാടികൾ സംഘടിപ്പിച്ചിട്ടും, ലതാ മങ്കേഷ്‌കറിന് വേണ്ടി പാകിസ്താൻ ഒരു പരിപാടിയും നടത്തിയിട്ടില്ലെന്നും അദ്ദേഹം പറഞ്ഞു. തീവ്രവാദം വളർത്തിയതിന് പാകിസ്താനെ അദ്ദേഹം കാവ്യാത്മകമായ രീതിയിൽ പരിഹസിക്കുകയും ചെയ്തു. ലാഹോറിലെ ഫയസ് ഫിലിം ഫെസ്റ്റിവലിൽ സംസാരിക്കുകയായിരുന്നു അദ്ദേഹം.

Jab main Javed saab ki poetry sunti hoon toh lagta tha yeh kaise Maa Swarsati ji ki in pe itni kripa hai, lekin dekho kuch toh sachchai hoti hai insaan mein tabhi toh khudai hoti hai unke saath mein … Jai Hind @Javedakhtarjadu saab… 🇮🇳
Ghar mein ghuss ke maara .. ha ha 🇮🇳🇮🇳 https://t.co/1di4xtt6QF

— Kangana Ranaut (@KanganaTeam) February 21, 2023