വൈവിധ്യമാർന്ന സംസ്കരങ്ങളുടെയും പാരമ്പര്യങ്ങളുടെയും നാടാണ് നമ്മുടെ ഭാരതം. അതിൽ വർണ്ണ വൈവിധ്യങ്ങളുടെ ഉത്സവമാണ് ഹോളി. മാർച്ച് 8-ന് നടക്കുന്ന ഹോളിയെ വരവേൽക്കാൻ രാജ്യമൊരുങ്ങി കഴിഞ്ഞു. പൗർണമി ദിനത്തിലാണ് വർണ്ണോത്സവത്തിന് തുടക്കമാകുന്നത്.
ഹോളി ദിനം അടുക്കും തോറും സംസ്ഥാനങ്ങളിലാകെ ആഘോഷങ്ങളുടെയും ആരവങ്ങളുടെയും ശബ്ദമുയർന്നുകൊണ്ടിരിക്കുകയാണ്. പുരാണങ്ങളിൽ വിവിധ തലത്തിലാണ് ഹോളിയെ കുറിച്ച് പ്രതിപാദിക്കുന്നത്. ‘ഹോളി ദഹൻ’, ‘ചോട്ടി ഹോളി’ എന്നീ പേരുകളിലാണ് പുരാതന കാലത്ത് ഹോളി ആഘോഷിച്ചിരുന്നത്.
ഹോളി ദിനത്തിൽ പകൽ സമയങ്ങളിൽ നിറങ്ങൾ കൊണ്ട് കൊണ്ടാടുമ്പോൾ വൈകുന്നേരങ്ങളിൽ അടുത്ത ബന്ധുക്കളോടും മറ്റുള്ളവരോടും സ്നേഹവും ബഹുമാനവും പ്രകടിപ്പിക്കുകയും ചെയ്യുന്നു. ഹോളി ദിനത്തെ വരവേൽക്കുന്നതിന് മുന്നോടിയായി ദീപങ്ങൾ തെളിയിക്കുകയാണ് പതിവ്.
ഹോളി ആഘോഷങ്ങളോടനുബന്ധിച്ച് സന്ദർശിക്കേണ്ട സ്ഥലങ്ങൾ
മഥുര
ഹോളി ആഘോഷങ്ങളിൽ പ്രശസ്തമാണ് മഥുര.ഭഗവാൻ കൃഷ്ണന്റെ ജന്മസ്ഥലമായി മഥുര അറിയപ്പെടുന്നതിനാൽ ഹോളിയ്ക്ക് ഇവിടെയുള്ള പ്രാധാന്യം ചെറുതല്ല. പൂക്കളും വർണ്ണങ്ങളുമായി ഒമ്പത് ദിവസം നീണ്ടു നിൽക്കുന്ന ആഘോഷമാണ് ഇവിടെയുള്ളത്.
ബർസാന
ബർസാനയിൽ ലാത്മാർ ഹോളി ആഘോഷിക്കപ്പെടുന്നു. ആഘോഷവേളയിൽ സ്ത്രീകൾ പുരുഷന്മാരെ വടികൊണ്ട് അടിക്കുകയും പരിച ഉപയോഗിച്ച് അടി തടുക്കുകയും ചെയ്യുന്നത് കാണാം.
ഉദയ്പൂർ
രാജകീയമായ രീതിയിലാണ് നഗരത്തിൽ ഹോളി ആഘോഷിക്കുന്നത്. രാജകൂടുംബാംഗങ്ങൾ ഉൾപ്പടെ പരമ്പരാഗത രാജസ്ഥാനി വസ്ത്രങ്ങൾ ധരിച്ചുള്ള ആചാരങ്ങൾ ദൃശ്യമാകും. തിന്മയുടെ മേൽ നന്മയെ സൂചിപ്പിക്കുന്നതിനാണ് ഇവിടെ ആഘോഷം നടക്കുന്നത്. പരമ്പരാഗത നാടൻ പാട്ടുകളും നാടോടി നൃത്തങ്ങളും ഇവിടെ നടക്കാറുണ്ട്.
പഞ്ചാബ്
സിഖുകാർ അവരുടെ സ്വന്തം ശൈലിയിൽ ആഘോഷിക്കുന്ന ഹോളിയാണ് പഞ്ചാബിലുള്ളത്. ഹോള മൊഹല്ല എന്നാണ് ഇവിടെ ഹോളി അറിയപ്പെടുന്നത്. പ്രദേശ വാസികൾ ആചാരമെന്ന നിലയിലാണ് ഹോളി ആഘോഷിക്കുന്നത്.
