വേനൽകാലം ഇങ്ങ് എത്തി. ജനങ്ങൾ കനത്ത ജാഗ്രത പാലിക്കണമെന്ന നിർദേശമാണ് ഇപ്പോഴത്തെ വാർത്ത. എന്നാൽ എപ്പോഴും വീടിന് പുറത്തിറങ്ങാതിരിക്കുക എന്നത് അൽപം ബുദ്ധിമുട്ടേറിയ കാര്യമാണ്. വേനലായാൽ അധികവും തണുപ്പേറിയ പാനിയങ്ങളും ധാരാളം വെള്ളവും കുടിയ്ക്കണമെന്നാണ് ആരോഗ്. വിദഗ്ധർ പറയുന്നത്. അതിനുള്ള മികച്ച പാനിയമാണ് ലെസ്സി.
അൽപം തണുത്ത പാലുണ്ടെങ്കിൽ കാര്യം സിമ്പിളാണ്. വടക്കേ ഇന്ത്യക്കാരുടെ പാനിയമാണെങ്കിലും ഇപ്പോഴിത് കേരളീയർക്കും പ്രിയപ്പെട്ടതാണ്. പ്രിയപ്പെട്ട പാനിയം കുടിക്കണമെങ്കിൽ പുറത്തുപോയി കുടിക്കേണ്ട അവസ്ഥയാണ് നിലവിലുള്ളത്. അത്തരത്തിൽ വീട്ടിൽ എളുപ്പത്തിലുണ്ടാക്കാൻ കഴിയുന്ന സ്വീറ്റ് ലെസ്സിയാണ് ഇന്നത്തെ താരം. കട്ടി തൈരും പാലുമാണ് ഇതിനാവശ്യം.
എങ്ങനെ സ്വാദൂറും സ്വീറ്റ് ലെസ്സിയുണ്ടാക്കാം?
ചേരുവകൾ:
കട്ടിയുള്ള തൈര്-രണ്ട് കപ്പ്
തണുത്ത പാൽ-അര കപ്പ്
തണുത്ത വെള്ളം- കാൽ കപ്പ്
പഞ്ചസാര-മൂന്ന് ടേബിൾ സ്പൂൺ
ഏലയ്ക്ക പൊടിച്ചത്- ഒരു ടീസ്പൂൺ
പനിനീര്- കാൽ ടിസ്പൂൺ
ഐസ് ക്യൂബ്-ഏഴോ എട്ടോ
അൽപം നുറുക്കിയ ബദാമും അണ്ടിപ്പരിപ്പും
ഉണ്ടാക്കുന്ന വിധം:
ഒരു ബൗളിലേക്ക് തൈര് ഒഴിച്ചെടുക്കുക. തണുത്ത പാലും തണുത്ത വെള്ളവും ചേർത്ത് കുമിളകൾ വരാതെ ഇളക്കുക. ഇതിലേക്ക് പഞ്ചസാരയും ഏലയ്ക്കാപ്പൊടുയും പനിനീരും ചേർക്കുക. പൊടിച്ച പഞ്ചസാര ആണെങ്കിൽ പെട്ടെന്ന് അലിഞ്ഞ് ചേരും. ഇതിലേക്ക് ഐസ്ക്യൂബുകൾ ചേർക്കുക. തുടർന്ന് തയ്യറാക്കിയ മിശ്രിതം മിക്സിയുടെ ജാറിലേക്ക് മാറ്റുക. മിക്സിയിൽ മിശ്രിതം നന്നായി അടിച്ച് യോജിപ്പിക്കണം. ഇപ്പോൾ സ്വീറ്റ് ലെസ്സി തയ്യാറായി കഴിഞ്ഞു. ഗ്ലാസ്സിലേക്ക് മാറ്റി ഇതിലേക്ക് നുറുക്കി വെച്ചിരിക്കുന്ന ബദാമും അണ്ടിപ്പരിപ്പും ചേർക്കുക.
