നമ്മുടെ തൊടിയിൽ സുലഭമായി വളരുന്ന കിഴങ്ങുവർഗമാണ് ചേമ്പ്. ചേമ്പിന്റെ വിത്ത് പോലെ തന്നെ പോഷക സമൃദ്ധമാണ് അതിന്റെ തണ്ടും ഇലകളും. ചേമ്പിലയുടെ ഗുണങ്ങളറിഞ്ഞാൽ ഞെട്ടിപ്പോകും. വൈറ്റമിൻ എ കൊണ്ട് നിറഞ്ഞതാണ് ചേമ്പില. വൈറ്റമിൻ ബി, സി, തയാമിൻ, റൈബോഫ്ലേവിൻ, ഫോളേറ്റ് എന്നിവയും മാംഗനീസ്, കോപ്പർ, പൊട്ടാസ്യം, അയൺ എന്നിവയയും അടങ്ങിയിരിക്കുന്നു.
35 കാലറിയും ഫൈബറുകളും ചെറിയതോതിൽ കൊഴുപ്പും ഇതിൽ അടങ്ങിയിട്ടുണ്ട്. അർബുദത്തെ തടയാനും രോഗപ്രതിരോധ സംവിധാനം മെച്ചപ്പെടുത്താനും കണ്ണിന്റെ ആരോഗ്യത്തിനും ചേമ്പില നല്ലതാണ്. ദഹന സംബന്ധമായ പ്രശ്നങ്ങൾക്കും മികച്ചതാണ് ചേമ്പില. ചേമ്പിന്റെ താളും വിത്തും കറിവെയ്ക്കുമെങ്കിലും ഇലകൾ കളയാറാണ് പതിവ്. എന്നാൽ പലർക്കും ഇതിന്റെ ആരോഗ്യഗുണങ്ങളെ കുറിച്ച് അറിയില്ലെന്നതാണ് വസ്തുത.
കാലറി വളരെ കുറവായതിനാൽ ശരീരഭാരം കുറയ്ക്കാനും ചേമ്പില സഹായിക്കുന്നു. പൊട്ടാസ്യവും ആന്റി ഇൻഫ്ലറ്റേറി സംയുക്തങ്ങളും അടങ്ങിയിരിക്കുന്നതിനാൽ രക്തസമ്മർദ്ദം കുറയ്ക്കുവാനും ഇതിലെ ജീവകങ്ങൾ ഗർഭസ്ഥശിശുവിന്റെ തലച്ചോറിന്റെ വളർച്ചയ്ക്കും നാഡീവ്യൂഹത്തെ ശക്തിപ്പെടുത്തുവാനും നല്ലതാണ്. വൈറ്റമിൻ എ ധാരാളം അടങ്ങിയതിനാൽ ചർമ്മത്തിലെ ആരോഗ്യത്തിനും ഇത് ഗുണം ചെയ്യും.
