ന്യൂഡൽഹി: വിദേശ മാദ്ധ്യമങ്ങളെ ശക്തമായി വിമർശിച്ച് കേന്ദ്രമന്ത്രി അനുരാഗ് ഠാക്കൂർ. ചില വിദേശ മാദ്ധ്യമങ്ങൾക്ക് ഭാരതത്തിനോടും പ്രധാനമന്ത്രി നരേന്ദ്രമോദിയോടും പകയെന്ന് അദ്ദേഹം ആരോപിച്ചു. ഇന്ത്യയോടും നമ്മുടെ പ്രധാനമന്ത്രിയോടും വിദ്വേഷം വളർത്തുന്ന ചില വിദേശ മാധ്യമങ്ങൾ ഇന്ത്യയിലെ ജനാധിപത്യത്തെയും ബഹുസ്വര സമൂഹത്തെയും കുറിച്ച് നുണകൾ പ്രചരിപ്പിക്കുന്നുവെന്നും ഠാക്കൂർ പറഞ്ഞു.
ഇന്ത്യയിലെ മാദ്ധ്യമ സ്വാതന്ത്ര്യം മൗലികാവകാശം പോലെ പവിത്രമായതാണ്. അജണ്ടയോടെ പ്രവർത്തിക്കുന്ന മാദ്ധ്യമങ്ങൾ ഇന്ത്യയെ പഠിപ്പിക്കാൻ വരേണ്ട. ഇന്ത്യയിലെ ജനാധിപത്യവും നമ്മൾ ജനങ്ങളും വളരെ പക്വതയുള്ളവരാണ്, അത്തരം അജണ്ട നയിക്കുന്ന മാദ്ധ്യമങ്ങളിൽ നിന്ന് ജനാധിപത്യത്തിന്റെ വ്യാകരണം പഠിക്കേണ്ട ആവശ്യവുമില്ല. കാശ്മീരിലെ മാദ്ധ്യമസ്വാതന്ത്ര്യത്തിന് വേണ്ടി പ്രചരിപ്പിക്കുന്ന നഗ്‌നമായ നുണകൾ അപലപനീയമാണ്. ന്യൂയോർക്ക് ടൈംസ് കശ്മീരിനെ കുറിച്ച് നുണകൾ പ്രചരിപ്പിക്കുന്നുവെന്നും അദ്ദേഹം കുറ്റപ്പെടുത്തി.
തങ്ങളുടെ നിർണായക അജണ്ട വളർത്താൻ ശ്രമിക്കുന്ന അത്തരം മാദ്ധ്യമങ്ങളെ ഇന്ത്യൻ മണ്ണിൽ ഇന്ത്യക്കാർ ഒരിക്കലും അനുവദിക്കില്ലെന്നും ഠാക്കൂർ വ്യക്തമാക്കി. ഇന്ത്യയെക്കുറിച്ചും നമ്മുടെ പ്രധാനമന്ത്രിയെക്കുറിച്ചും നുണകൾ പ്രചരിപ്പിക്കുന്നതിന്റെ തുടർച്ചയായാണിത്. അത്തരം നുണകൾ അധികകാലം നിലനിൽക്കില്ലെന്നും അദ്ദേഹം ചൂണ്ടിക്കാട്ടി. ട്വിറ്ററിലൂടെയാണ് അനുരാഗ് ഠാക്കൂർ പ്രതികരിച്ചത്.
