ചട്, ഉഷ്ണം, സൂര്യതാപം… അങ്ങനെ അങ്ങനെ പോവുകയാണ് വേനൽക്കാലത്തെ ചൂടിന്റെ വിശേഷണങ്ങൾ. വേനലായാൽ പിന്നെ ചർമ്മ സംബന്ധമായ നിരവധി പ്രശ്നങ്ങളാണ് നമ്മെ അലട്ടുന്നത്. അതുകൊണ്ട് തന്നെ പ്രത്യേക കരുതലും ചർമ്മത്തിനാവശ്യമാണ്. ദീർഘനേരം വെയിൽ കൊള്ളുന്നത് കഴുത്തിലും കൈയിലും മറ്റ് ഭാഗങ്ങളിലും ചുവന്ന പാടുകൾ രൂപപ്പെടുന്നതിന് കാരണമാകും.
അമിതമായി വെയിൽ കൊള്ളുന്നത് സൂര്യതാപമേൽക്കുന്നതിന് കാരണമാകും. തൊലിപ്പുറത്ത് ചുവപ്പു നിറവും വേദനയാണ് ഇതിന്റെ പ്രധാന ലക്ഷണം. സൂര്യതാപമേറ്റ് രണ്ട് മുതൽ ആറ് മണിക്കൂർ വരെയാണ് ഇത് പ്രകടമാകുന്നത്. 12 മുതൽ 24 മണിക്കൂറിനിടയിലാണ് ഇത് മൂർധന്യാവസ്ഥയിലെത്തുക. തൊലി പൊള്ളുകയും അടർന്നുപോകുന്നതും സാധാരണമാണ്. സൂര്യതാപമേറ്റാൽ ശരീരത്തിലെ ജലാംശം നഷ്ടപ്പെടുന്നു. സൂര്യതാപമേറ്റാൽ ഉടൻ തന്നെ ആ ഭാഗം നന്നായി ഐസ് വെച്ച് തണുപ്പിക്കണം. ഒപ്പം തന്നെ ധാരാളം വെള്ളം കുടിച്ച് ശരീരത്തിൽ ജലാംശം ഉറപ്പാക്കുകയും വേണം. കറ്റാർവാഴയുടെ ജെൽ ഉപയോഗിക്കുന്നത് മികച്ച ഫലം നൽകും.
സൂര്യതാപമേറ്റാൽ ശരീരത്തോടുള്ള ഇടപെടൽ കൂടുതൽ സൂക്ഷിക്കണം. ചർമ്മത്തില സുഷിരങ്ങളിൽ അടിയുന്ന അഴുക്കുകൾ കുളിക്കുമ്പോൾ തന്നെ പോകുന്നതാണ്. വൃത്തിയാക്കാൻ പരിക്കൻ സ്ക്രബ്ബുകൾ ഉപയോഗിക്കാതിരിക്കുക. സോപ്പും ഫേസ് വാഷും ഉപയോഗിക്കുമ്പോഴും പ്രത്യേകം ശ്രദ്ധിക്കണം. അയഞ്ഞ കോട്ടൺ വസ്ത്രങ്ങൾ ധരിക്കുന്നതാണ് നല്ലത്.
ശരീരം മുഴുവൻ മൂടുന്ന വസ്ത്രമാണ് ചൂടുകാലത്തിന് അനുയോജ്യം. ചെവിയും കാതും കഴുത്തുമെല്ലാം മൂടാൻ കോട്ടൺ സ്കാർഫുകൾ ഉപയോഗിക്കാവുന്നതാണ്. എസ്പിഎഫ് 30-ന് മുകളിലുള്ള സൺസ്ക്രീൻ ഏറ്റവും പ്രധാനമാണ്. സൂര്യതാപത്തിന്റെ പ്രധാന കാരണങ്ങളായ യുവിഎ, യുവിബി റേഡിയേഷനിൽ നിന്ന് ചർമത്തെ സംരക്ഷിക്കാൻ സൺസ്ക്രീനിന് കഴിയും. രണ്ട് മുതൽ മൂന്ന് മണിക്കൂർ ഇടവേളകളിലാണ് ഇത് ഉപയോഗിക്കേണ്ടത്. പുറത്തിറങ്ങുമ്പോൾ വെള്ളം കരുതണമെന്ന കാര്യവും മറക്കരുത്.
