ചെന്നൈ: ബിരിയാണി ഇഷ്ടമല്ലാത്തവരായി ആരും ഉണ്ടാകില്ല. എന്നാൽ ആഗ്രഹിക്കുമ്പോൾ ഒരു ബിരിയാണി കിട്ടിയെന്ന് വരില്ല. ഉണ്ടാക്കുക അത്രക്ക് എളുപ്പവുമല്ല. എന്നാൽ ബിരിയാണി കിട്ടുന്ന ഒരു എടിഎം ഉണ്ടെങ്കിലോ എത്ര നന്നായിരിക്കും അല്ലേ. എന്നാൽ അത്തരത്തിൽ ഒരു എടിഎം ലെഷീൻ ചെന്നൈയിൽ പ്രവർത്തനം ആരംഭിച്ചിരിക്കുകയാണ്.
ആവശ്യമുള്ളപ്പോൾ മിനിറ്റുകൾക്കുള്ളിൽ ബിരിയാണി സ്വന്തമാക്കാവുന്നതാണ്. ചെന്നൈ ആസ്ഥാനമായ ‘ഭായ് വീട്ടു കല്യാണം’ എന്ന സ്റ്റാർട്ടപ്പാണ് ഈ ഓട്ടോമേറ്റഡ് മെഷീൻ പുറത്തിറക്കിയിരിക്കുന്നത്. ചെന്നൈയിലെ കൊളത്തൂരിലാണ് പ്രീമിയം വെഡിംങ് സ്റ്റൈൽ ബി.വി.കെ ബിരിയാണി ലഭിക്കുന്നത്. ഓർഡർ ചെയ്തു കഴിഞ്ഞാൽ മെഷീനിലൂടെ മനോഹരമായി പായ്ക്ക് ചെയ്ത ബിരിയാണി ലഭിക്കും. മെഷീനിന്റെ സ്ക്രീനിൽ ലഭ്യമായ ബിരിയാണികളുടെ മെനു പ്രദർശിപ്പിച്ചിട്ടുണ്ടാകും. ആവശ്യക്കാരൻ ബിരിയാണിയുടെ എണ്ണം, പേര് , ഫോൺ നമ്പർ തുടങ്ങിയ വിശദാംശങ്ങൾ നൽകണം. അതിനുശേഷം ക്യൂ ആർ കോഡ് വഴിയോ കാർഡ് വഴിയോ പണമടയ്ക്കാം.
പണമടയ്ക്കൽ പ്രക്രിയ പൂർത്തിയായി കഴിഞ്ഞാൽ ബിരിയാണി പാകമാകുന്നതിനുള്ള സമയം സ്ക്രീനിൽ കാണിക്കും. ശേഷം എ.ടി.എമ്മിൽ പണം വരുന്നതുപോലെ മെഷീനിന്റെ താഴ്ഭാഗം തുറക്കാം. അവിടെ നിന്നും മനോഹരമായി പായ്ക്ക് ചെയ്ത ബിരിയാണി കൈപ്പറ്റാനാകും.
