ന്യൂഡൽഹി: ഡൽഹിയിലെ ഗീത കോളനിയിൽ വിദേശിയുടെ മൃതദേഹം അഴുകിയ നിലയിൽ കണ്ടെത്തി. അണ്ടർപാസിന് സമീപമാണ് 66 വയസ്സിന് മുകളിൽ പ്രായമുള്ള വിദേശിയുടെ മൃതദേഹം കണ്ടെത്തിയത്. മൗറീഷ്യസിൽ നിന്ന് വന്ന ബാഗ്വത് ലുച്ച്മി എന്നയാളാണ് മരിച്ചതെന്ന് തിരിച്ചറിഞ്ഞിട്ടുണ്ട്. ടൂറിസ്റ്റ് വിസയിൽ ഫെബ്രുവരി 6-നാണ് ഇയാൾ ഇന്ത്യയിലെത്തിയതെന്ന് പോലീസ് പറഞ്ഞു.
അണ്ടർപാസിലൂടെ സഞ്ചരിച്ച വഴിയാത്രക്കാരനാണ് മൃതശരീരം കണ്ടത്. തുടർന്ന് അയാൾ പോലീസിൽ വിവരമറിയിക്കുകയായിരുന്നു. മൃതദേഹത്തിന് മൂന്ന് ദിവസത്തെ പഴക്കമുണ്ടെന്നാണ് പ്രാഥമിക റിപ്പോർട്ട്. പോസ്റ്റ്മോർട്ടത്തിനായി മൃതദേഹം ആശുപത്രിയിലേക്ക് മാറ്റിയിട്ടുണ്ട്.
മൃതദേഹം കണ്ടെത്തിയ സ്ഥലത്ത് നിന്ന് പാസ്പോർട്ടുകളും മറ്റ് രേഖകളും ലഭിച്ചിട്ടുണ്ട്. തുടർ അന്വേഷണത്തിനായി ലുച്ച്മി സഞ്ചരിച്ച സ്ഥലങ്ങൾ കണ്ടെത്തുകയും അവിടെ പരിശോധന നടത്തുകയും ചെയ്യുമെന്ന് പോലീസ് അറിയിച്ചു.
