മലയാളികൾക്കിടയിൽ ഏറെ സ്വീകാര്യതയുള്ള തെന്നിന്ത്യൻ താരമാണ് അല്ലു അർജുൻ. മലയാളത്തിലെ സൂപ്പർ താരങ്ങൾക്ക് കിട്ടുന്ന പോലെ തന്നെയുള്ള അതേ വരവേൽപ്പും ആരവവുമാണ് അല്ലു അർജുനും കേരളത്തിൽ നിന്ന് കിട്ടുന്നത്. അന്യഭാഷാ ചിത്രങ്ങൾ കളക്ഷൻ വാരുന്ന ഇപ്പോഴത്തെ ട്രെൻഡിന് എത്രയോ കാലം മുൻപ് തന്നെ കേരളത്തിൽ വലിയ ഫാൻ ബേസുള്ള താരമായിരുന്നു അല്ലു അർജുൻ. മല്ലു അർജുൻ എന്നാണ് താരത്തെ മലയാളി ആരാധകർ വിളിച്ചത. ആര്യ, ബണ്ണി, ഹാപ്പി, ഹീറോ തുടങ്ങി അല്ലുവിന്റെ ചിത്രങ്ങൾക്ക് കേരളത്തിൽ പ്രേക്ഷകർ ഏറെയായിരുന്നു. ഈ ചിത്രങ്ങളുടെ മലയാളം ഡബ്ബ്ഡ് പതിപ്പുകൾ വിതരണക്കാർക്ക് വലിയ സാമ്പത്തിക നേട്ടവും ഉണ്ടാക്കിക്കൊടുത്തിട്ടുണ്ട്.
ഇപ്പോഴിതാ താരത്തിന്റെ ആരാധകർക്ക് സന്തോഷം നൽകുന്നൊരു വാർത്തയാണ് പുറത്തുവരുന്നത്. ആ പഴയ അല്ലു അർജുനെ വീണ്ടും ബിഗ് സ്ക്രീനിൽ കാണാനുള്ള അവസരമാണ് വരുന്നത്. അല്ലുവിന്റെ കരിയറിലെ മികച്ച വിജയങ്ങളിൽ ഒന്നായിരുന്ന ഹീറോ (ദേശമുദുറു)യാണ് വീണ്ടും തിയേറ്ററുകളിൽ എത്താൻ ഒരുങ്ങുന്നത്. 4 കെ ദൃശ്യമികവോടെയാണ് ചിത്രം തിയേറ്ററുകളിൽ എത്തുക.
താരത്തിന്റെ പിറന്നാൾ ദിനത്തോട് അനുബന്ധിച്ചാണ് ചിത്രം തെന്നിന്ത്യൻ സംസ്ഥാനങ്ങളിൽ റിലീസിന് ഒരുങ്ങുന്നത്. അദ്ദേഹത്തിന് ഏറെ ആരാധകരുള്ള കേരളത്തിലും ചിത്രത്തിന് റിലീസ് ഉണ്ട്. ഏപ്രിൽ 8-നാണ് അല്ലു അർജുന്റെ പിറന്നാൾ. ആന്ധ്രയിലും തെലങ്കാനയിലും ഏപ്രിൽ 6, കേരളത്തിൽ ഏപ്രിൽ 7, കർണാടകയിലും തമിഴ്നാട്ടിലും ഏപ്രിൽ 8 എന്നിങ്ങനെയാണ് ചിത്രത്തിന്റെ റിലീസ് തീയതികൾ. ഖാദർ ഹസൻ ആണ് ചിത്രത്തിന്റെ കേരളത്തിലെ വിതരണം. ചിത്രത്തിന്റെ ട്രെയിലർ അദ്ദേഹം സമൂഹമാദ്ധ്യമങ്ങളിൽ പങ്കുവെച്ചു.
2007 ൽ പ്രദർശനത്തിനെത്തിയ റൊമാന്റിക് ആക്ഷൻ ചിത്രമായ ഹീറോയുടെ രചനയും സംവിധാനവും പുരി ജഗന്നാഥ് ആയിരുന്നു. ഹൻസിക മോട്വാനിയാണ് സിനിമയിലെ നായിക. പ്രദീപ് റാവത്ത്, അലി, ചന്ദ്ര മോഹൻ, ദേവൻ, സുബ്ബരാജു തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
