ബെംഗളൂരു: ബെംഗളൂരുവിലെ പ്രശസ്തമായ കബൺ പാർക്കിൽ പുതിയ നിയന്ത്രണങ്ങൾ ഏർപ്പെടുത്തി അധികൃതർ. വിചിത്രമായ നിയന്ത്രണങ്ങളാണ് പാർക്കിൽ ഏർപ്പെടുത്തിയിരിക്കുന്നത്. നിയന്ത്രണ ലംഘനം നടക്കുന്നുണ്ടോയെന്ന് ഉറപ്പുവരുത്താനായി ഗാർഡുകളെയും നിയമിച്ചിട്ടുണ്ട്. ഇവർ പാർക്കിനുള്ളിൽ ചുറ്റി നടന്ന് പുതിയ നിയന്ത്രണങ്ങൾ ലംഘിക്കുന്നവർക്ക് ഉച്ചഭാഷിണിയിലൂടെ മുന്നറിയിപ്പ് നൽകും.
പ്രധാനമായി നിയന്ത്രണം ഏർപ്പെടുത്തിരിക്കുന്നത് കമിതാക്കൾക്കാണ്. കമിതാക്കൾ അടുത്തിരിക്കാൻ പാടില്ല, കമിതാക്കൾ പാർക്കിനുള്ളിൽ സ്നേഹ പ്രകടനം നടത്താൻ പാടില്ല, പാർക്കിലെ കുറ്റിക്കാട്ടിൽ മാറിയിരിക്കാൻ പാടില്ല എന്നിങ്ങനെയാണ് പുതിയ നിയന്ത്രണങ്ങൾ. കൂടാതെ കുട്ടികൾ അടക്കം പാർക്കിലെ മരത്തിൽ കയറാൻ പാടില്ല, പാർക്കിൽ ഭക്ഷണം കൊണ്ട് വരാനോ കഴിയ്ക്കാനോ പാടില്ല, ഫോട്ടോ എടുക്കുന്നതിനും വീഡിയോ ചിത്രീകരിക്കുന്നതിനുമടക്കം നിയന്ത്രണങ്ങൾ ഏർപ്പെടുത്തിയിട്ടുണ്ട്.
എന്നാൽ സംഭവത്തിൽ വിശദീകരണവുമായി എത്തിയിരിക്കുകയാണ് പാർക്ക് അധികൃതർ. പാർക്കിനുള്ളിൽ കമിതാക്കൾ അടുത്തിരിക്കുന്നതിനെ കുറിച്ചും സ്നേഹ പ്രകടനങ്ങളെ കുറിച്ചും നിരവധി പരാതികൾ വരുന്നുണ്ട്. കൂടാതെ പാർക്കിൽ നിറയെ പാമ്പുകളും പ്രാണികളുമുണ്ട് ഇത് കമിതാക്കളുടെ സുരക്ഷയെ ബാധിച്ചേക്കും. ഇത്തരത്തിലുള്ള കാരണങ്ങളാലാണ് പുതിയ നിയന്ത്രണങ്ങൾ ഏർപ്പെടുത്തിയിരിക്കുന്നത് എന്നാണ് അധികൃതർ നൽകുന്ന വിശദീകരണം. 300 ഏക്കർ വിസ്തൃതിയുള്ള പാർക്കിൽ ഒരു മാസമായി പുതിയ നിയന്ത്രണങ്ങൾ ഏർപ്പെടുത്തിയിട്ട്.
