ഡ്രൈവർ അബോധാവസ്ഥയിലായതോടെ സ്‌കൂൾ ബസ് നിയന്ത്രിച്ച് 7-ാം ക്ലാസ് വിദ്യാർത്ഥി രക്ഷകനായി. സ്‌കൂൾ ബസ് ഓടിച്ചിരുന്ന സ്ത്രീ ബോധരഹിതയായത് ശ്രദ്ധയിൽപ്പെട്ട 12-കാരനാണ് ബസിന്റെ നിയന്ത്രണമേറ്റെടുത്ത് രക്ഷകനായത്. വാഹനത്തിലുണ്ടായിരുന്ന 66 വിദ്യാർത്ഥികളും 7-ാം ക്ലാസുകാരന്റെ സമയോചിത ഇടപെടലിലൂടെ രക്ഷപ്പെടുകയായിരുന്നു. കഴിഞ്ഞ ബുധനാഴ്ച യുഎസിലെ മിഷിഗണിലാണ് സംഭവമുണ്ടായത്.
ഡില്ലൺ റീവ്‌സ് എന്ന വിദ്യാർത്ഥിയാണ് സഹപാഠികളെ രക്ഷിച്ചതോടെ സോഷ്യൽ മീഡിയയിൽ വൈറലായത്. സ്‌കൂൾ ബസിൽ ഡ്രൈവർ സീറ്റിന് മുകളിലായി സ്ഥാപിച്ചിരിക്കുന്ന കാമറയിൽ ഇതിന്റെ ദൃശ്യങ്ങൾ പതിഞ്ഞിരുന്നു. ട്രാൻസ്‌പോർട്ടേഷൻ ബേസിലേക്ക് വിളിക്കുന്ന ഡ്രൈവർ തനിക്ക് സുഖമില്ലെന്ന് പറയുന്നതാണ് സംഭവങ്ങളുടെ തുടക്കം. ഇതിന് തൊട്ടുപിന്നാലെ ഡ്രൈവർ ബോധരഹിതയായി.
ഡ്രൈവർ സീറ്റിന് പിറകിൽ അഞ്ചാമത്തെ നിരയിലായിരുന്നു 7-ാം ക്ലാസുകാരനായ ഡില്ലൺ ഇരുന്നിരുന്നത്. ഡ്രൈവറിന്റെ പെരുമാറ്റത്തിൽ അസ്വാഭാവികത തോന്നിയ ഡില്ലൺ ഉടൻ തന്നെ എഴുന്നേറ്റ് ബസിന്റെ മുൻവശത്തേക്ക് ഓടിവരികയായിരുന്നു. അപ്പോഴേക്കും ഡ്രൈവർ അബോധാവസ്ഥയിലായി. ഉടൻ തന്നെ ഡില്ലൺ സ്റ്റിയറിംഗ് പിടിക്കുകയും ബസിന്റെ നിയന്ത്രണമേറ്റെടുക്കുകയും ചെയ്തു. ഇതിനിടെ പരിഭ്രാന്തരായ വിദ്യാർത്ഥികൾ ഉച്ചത്തിൽ ഓളിയിടുന്നുമുണ്ട്. സുരക്ഷിതമായി ബസ് നിർത്തിയിട്ട ഡില്ലൺ ”ആരെങ്കിലും ഒന്ന് 911ലേക്ക് വിളിക്കൂ”വെന്ന് സഹപാഠികളോട് ആക്രോശിക്കുന്നതും വീഡിയോയിൽ കാണാം.
എന്തായാലും ഡില്ലണിന്റെ ധീരപ്രവൃത്തി ഏവരും അറിയുകയും സ്‌കൂളിൽ വച്ച് നടന്ന പ്രത്യേക ചടങ്ങിൽ കൊച്ചുമിടുക്കന് അംഗീകാരം നൽകുകയും ചെയ്തു.
Comments