കാൻബെറ: ഖാലിസ്താനെതിരെ ഓസ്ട്രേലിയയിൽ വിജയം. സിഡ്നിയിലെ ബ്ലാക്ക്ടൗൺ സിറ്റിയിൽ നടത്താനിരുന്ന ഖാലിസ്താൻ പ്രചരണ പരിപാടി റദ്ദാക്കാൻ ഓസ്ട്രേലിയൻ അധികൃതർ തീരുമാനിച്ചു. സിഖ് ഫോർ ജസ്റ്റിസ് എന്ന സംഘടനയുടെ പ്രചരണ പരിപാടിയ്ക്കെതിരെ നൂറുകണക്കിന് പരാതികൾ ഉയർന്നതിനെ തുടർന്നാണ് പരിപാടി റദ്ദാക്കാൻ തീരുമാനിച്ചത്. ഇന്ന് രാവിലെയാണ് പരിപാടി റദ്ദാക്കിയത്.
സിഡ്നിയിൽ എസ്എഫ്ജെ നടത്തുന്ന പ്രൊപ്പോഗണ്ട റഫറണ്ടം പരിപാടി ബ്ലാക്ക്ടൗൺ ലെഷർ സെന്റർ സ്റ്റാൻഹോപ്പിൽ നടക്കാനിരിക്കുകയായിരുന്നു. എന്നാൽ ജീവനക്കാർക്കും പൊതുജനങ്ങൾക്കും അക്രമങ്ങളെ കുറിച്ചുള്ള ആശങ്കകൾ കാരണമാണ് പരിപാടി റദ്ദാക്കിയതെന്ന് അധികൃതർ വ്യക്തമാക്കി. സിഖ്സ് ഫോർ ജസ്റ്റിസ് പ്രൈവറ്റ് ലിമിറ്റഡ് എന്ന സ്ഥാപനത്തെ കുറിച്ച് അന്വേഷണം നടക്കുകയാണെന്ന് അധികൃതർ വ്യക്തമാക്കി.
രാജ്യത്തെ ഹിന്ദു ക്ഷേത്രങ്ങളെ അപകീർത്തിപ്പെടുത്തുന്ന അക്രമികൾക്കെതിരെ ശിക്ഷാ നടപടികൾ സ്വീകരിക്കുമെന്ന് ഓസ്ട്രേലിയൻ അധികൃതർ അറിയിച്ചിട്ടുണ്ട്. കഴിഞ്ഞ കുറച്ച് മാസങ്ങളായി ഓസ്ട്രേലിയയിലെ പല ഹിന്ദു ക്ഷേത്രങ്ങളിലും ഖാലിസ്താൻ അനുകൂല മുദ്രാവാക്യങ്ങളും ഇന്ത്യാ വിരുദ്ധ ചുവരെഴുത്തുകളും അക്രമികൾ നടത്തുന്നുണ്ട്. ഇതിനെതിരെ കർശന നടപടികൾ സ്വീകരിക്കുമെന്ന് ഓസ്ട്രേലിയൻ ഹൈക്കമ്മീഷണർ ബാരി ഒ ഫാരെൽ പറഞ്ഞു.
