ലണ്ടൻ: ബ്രിട്ടനിലെ ഫെയർഫോർഡ് വ്യോമതാവളത്തിൽ വിന്യസിച്ചിരുന്ന മുഴുവൻ B-1B ബോംബർ വിമാനങ്ങളും അമേരിക്ക പിൻവലിച്ച് സ്വന്തം താവളങ്ങളിലേക്ക് തിരിച്ചയച്ചു. വ്യോമതാവളത്തിന് നേരെയുണ്ടായ സുരക്ഷാ ഭീഷണിയെ തുടർന്നാണ് നീക്കമെന്നാണ് റിപ്പോർട്ടുകൾ. എന്നാൽ ഭീഷണിയുടെ കൃത്യമായ സ്വഭാവം അമേരിക്ക ഔദ്യോഗികമായി വെളിപ്പെടുത്തിയിട്ടില്ല.
ഫെയർഫോർഡിൽ വിന്യസിച്ചിരുന്ന 12 വിമാനങ്ങളാണ് ഒക്ടോബർ നാലിന് അമേരിക്കയിലേക്ക് മടങ്ങിയത്. സാധാരണയായി ഇത്തരം സാഹചര്യങ്ങളിൽ മറ്റൊരു വിദേശ താവളത്തിലേക്ക് വിമാനങ്ങൾ മാറ്റുന്നതിന് പകരം സ്വന്തം താവളങ്ങളിലേക്ക് തിരിച്ചയച്ചത് ശ്രദ്ധേയമാണെന്ന് റിപ്പോർട്ടുകൾ പറയുന്നു.
ഫെയർഫോർഡ് ലക്ഷ്യമിട്ട് ഭീകരാക്രമണത്തിന് ഗൂഢാലോചന നടത്തിയെന്ന സംശയത്തിൽ ബ്രിട്ടീഷ് പൊലീസ് അന്വേഷണം തുടരുന്നതിനിടെയാണ് അമേരിക്കയുടെ നീക്കം. സെപ്റ്റംബർ 27ന് വ്യോമതാവളത്തിന് സമീപം സംശയാസ്പദമായ മൂന്ന് വാനുകൾ കണ്ടെത്തിയതിനെ തുടർന്ന് അഞ്ച് ബ്രിട്ടീഷ് യുവാക്കളെ അറസ്റ്റ് ചെയ്തിരുന്നു. പിന്നീട് ഇവരെ ജാമ്യത്തിൽ വിട്ടു. വാനുകളിൽ പെട്രോൾ കണ്ടെത്തിയെങ്കിലും സ്ഫോടകവസ്തുക്കൾ കണ്ടെത്തിയിരുന്നില്ല.
തുടർന്ന് ഒക്ടോബർ ഒന്നിന് ബ്രിട്ടീഷ്-ഇറാനിയൻ ഇരട്ട പൗരത്വമുള്ള 25കാരനെയും ഭീകരപ്രവർത്തനത്തിന് തയ്യാറെടുത്തെന്ന സംശയത്തിൽ അറസ്റ്റ് ചെയ്തു. ഇയാളെയും പിന്നീട് ജാമ്യത്തിൽ വിട്ടു. അന്വേഷണത്തിൽ വിദേശ ശക്തികളുടെ ഇടപെടലുണ്ടോയെന്നതും ബ്രിട്ടീഷ് അധികൃതർ പരിശോധിക്കുന്നുണ്ട്.
സംഭവത്തിൽ ഇറാന് പങ്കുണ്ടെന്നതിന് ശക്തമായ സൂചനകളുണ്ടെന്ന് ബ്രിട്ടീഷ് പ്രധാനമന്ത്രി ആൻഡി ബേൺഹാം നേരത്തെ പറഞ്ഞിരുന്നു. എന്നാൽ ഇറാൻ ആരോപണം നിഷേധിച്ചിട്ടുണ്ട്. പുതിയ ഭീഷണിയും നേരത്തെ നടന്ന ഗൂഢാലോചനാ അന്വേഷണവും തമ്മിൽ നേരിട്ടുള്ള ബന്ധമുണ്ടെന്ന് അമേരിക്ക ഇതുവരെ സ്ഥിരീകരിച്ചിട്ടില്ല.
അമേരിക്കൻ ബോംബർ വിമാനങ്ങളുടെ പ്രധാന യൂറോപ്യൻ പ്രവർത്തന കേന്ദ്രങ്ങളിലൊന്നാണ് ഫെയർഫോർഡ്. ഇറാനെതിരായ അമേരിക്കൻ സൈനിക നടപടികളിലും ഇവിടെനിന്നുള്ള വിമാനങ്ങൾ ഉപയോഗിച്ചിരുന്നു. വിമാനങ്ങൾ അമേരിക്കയിലേക്ക് തിരിച്ചെങ്കിലും ആഗോളതലത്തിൽ ദീർഘദൂര ആക്രമണശേഷി നിലനിർത്താൻ ബോംബർ സേന സജ്ജമാണെന്ന് യുഎസ് പ്രതിരോധ വിഭാഗം വ്യക്തമാക്കി.
