ഇന്ത്യക്കാരുടെ മൈക്രോ എസ്.യു.വി. എന്ന ആഗ്രഹത്തിന് കൃത്യമായ നിർവചനം നൽകിയ വാഹനമാണ് ടാറ്റ പഞ്ച്. ടാറ്റയുടെ ഏറ്റവും സുപ്രധാന മോഡലായി മാറിയ പഞ്ച് എസ്.യു.വി. ഇപ്പോൾ പുതിയ ഒരു നേട്ടത്തിന്റെ നിറവിലാണ്. വിപണിയിൽ അവതരിപ്പിച്ച് 19 മാസത്തിനുള്ളിൽ പഞ്ചിന്റെ രണ്ട് ലക്ഷം യൂണിറ്റ് പുറത്തിറക്കാൻ സാധിച്ചതിന്റെ ആഘോഷങ്ങളിലാണ് ടാറ്റ മോട്ടോഴ്സ് ഇപ്പോൾ.
2021 ഒക്ടോബർ മാസത്തിലാണ് ടാറ്റ മോട്ടോഴ്സ് മൈക്രോ എസ്.യു.വി. ശ്രേണിയിലേക്ക് പഞ്ച് എന്ന കുഞ്ഞൻ വാഹനം അവതരിപ്പിച്ചത്. വെറും 10 മാസം കൊണ്ടാണ് ഒരു ലക്ഷം യൂണിറ്റ് എന്ന നാഴികക്കല്ലിലേക്ക് എത്തിയത്. അതിലും വേഗതയിലാണ് രണ്ട് ലക്ഷം യൂണിറ്റ് തികച്ചത്.
5.49 ലക്ഷം മുതൽ 9.09 ലക്ഷം വരെയാണ് ടാറ്റ പഞ്ചിന്റെ എക്സ്-ഷോറൂം വില. പ്യൂർ, അഡ്വെഞ്ചർ, അകംപ്ലിഷ്ഡ്, ക്രിയേറ്റീവ് എന്നിങ്ങനെ നാല് വേരിയന്റുകളിൽ മാന്വൽ, എഎംടി ഗിയർബോക്സുകളിൽ ടാറ്റ പഞ്ച് ലഭ്യമാണ്. ഏറെ ആവേശത്തോടെയും ആനന്ദത്തോടെയും രണ്ട് ലക്ഷം എന്ന നമ്പർ തികച്ചിരിക്കുകയാണ് ടാറ്റ പഞ്ച്. പഞ്ചിനെ തിരഞ്ഞെടുത്തതിനും അതിവേഗത്തിൽ രണ്ടുലക്ഷമെന്ന നമ്പറിലേക്ക് എത്താൻ കഴിഞ്ഞതിനും ഇന്ത്യയോട് നന്ദി പറയുന്നു. എന്ന കുറിപ്പോടെ, രണ്ടുലക്ഷം തികഞ്ഞ വാഹനത്തിന്റെ ചിത്രം ഉൾപ്പെടെയാണ് ടാറ്റ മോട്ടോഴ്സ് ഈ സന്തോഷം സാമൂഹ മാദ്ധ്യമങ്ങളിൽ പങ്കുവെച്ചിരിക്കുന്നത്.
Comments