ഇലക്ട്രിക് ഇരുചക്രവാഹന നിർമ്മാതാക്കളായ കബീറ മൊബിലിറ്റി തങ്ങളുടെ പുതിയ ഇലക്ട്രിക് ബൈക്ക് പുറത്തിറക്കി. KM500 എന്ന ഇലക്ട്രിക് ക്രൂയിസറാണ് ഗോവ ആസ്ഥാനമായുള്ള കമ്പനി വാഹന വിപണിയിലെത്തിക്കുന്നത്. മണിക്കൂറിൽ 188 കിലോമീറ്റർ വേഗത വാഹനത്തിന് കൈവരിക്കാൻ കഴിയുമെന്നാണ് കമ്പനി അവകാശപ്പെടുന്നത്. ഒറ്റ ചാർജിൽ 344 കിലോമീറ്റർ റേഞ്ച് ലഭിക്കും.
ബൈക്കിന്റെ ഡെലിവറി 2024-ല് ആരംഭിക്കുമെന്ന് കബീറ മൊബിലിറ്റി അറിയിച്ചു. ഇന്ത്യയിലെ ഏറ്റവും വേഗതയേറിയതും ഏറ്റവും ദൈർഘ്യമേറിയതുമായ ഇലക്ട്രിക് മോട്ടോർസൈക്കിളായിരിക്കും KM500 എന്നും കമ്പനി പറഞ്ഞു. KM3000, KM4000 എന്നീ ഇലക്ട്രിക് ബൈക്കുകൾ ഇതിനോടകം തന്നെ കമ്പനി പുറത്തിറക്കിയിട്ടുണ്ട്.
ബൈക്കിന്റെ പൂർണ്ണമായ ഡിസൈൻ ഇതുവരെ പുറത്തുവന്നിട്ടില്ലെങ്കിലും, സംയോജിത LED DRL-കളോട് കൂടിയ വൃത്താകൃതിയിലുള്ള ഹെഡ്ലാമ്പുള്ള വാഹനമായിരിക്കും KM500 എന്ന് ടീസർ വ്യക്തമാക്കുന്നു. ഇലക്ട്രിക് ക്രൂയിസർ സിംഗിൾ സീറ്റർ ആണ്. കൂടാതെ ഇലക്ട്രിഫൈഡ് ബോബർ സ്റ്റൈലിംഗ് ലഭിക്കുന്നു. മിഡ്നൈറ്റ് ഗ്രേ, ഡീപ് കാക്കി, അക്വാമറൈൻ എന്നീ നിറങ്ങളിൽ KM5000 ലഭ്യമാണ്. വാഹനത്തിന്റെ എക്സ്-ഷോറൂം വില 3,15,000 രൂപയിൽ ആരംഭിക്കുന്നു. 11.6 kWh വാട്ടർ-കൂൾഡ് എൽഎഫ്പി ബാറ്ററി പായ്ക്കാണ് ബൈക്കിന് നൽകിയിരിക്കുന്നത്. 4G കണക്റ്റിവിറ്റിയുള്ള 7 ഇഞ്ച് സ്മാർട്ട് ടച്ച് സ്ക്രീൻ, ഡിജിറ്റൽ ഡാഷ്ബോർഡ് എന്നിവയും കമ്പനി നൽകുന്നു.
