തിരുവനന്തപുരം: പ്ലസ് വൺ പ്രവേശനത്തിനുള്ള അപേക്ഷ ജൂൺ രണ്ട് മുതൽ ഒമ്പത് വരെ സ്വീകരിക്കും. ജൂൺ 13-ന് ട്രയൽ അലോട്മെന്റും 19-ന് ആദ്യ അലോട്മെന്റും നടക്കും. ജൂലൈ അഞ്ചിന് ക്ലാസുകൾ ആരംഭിക്കും. പ്രവേശന നടപടികൾ സംബന്ധിച്ചുള്ള അറിയിപ്പുകൾ ഹയർസെക്കൻഡറി ഡയറക്ടറേറ്റ് പ്രസിദ്ധീകരിച്ചു.
അപേക്ഷ നൽകുന്നതിന് പഠിച്ച സ്‌കൂളിന്റെയോ, സർക്കാർ-എയ്ഡഡ് ഹയർ സെക്കൻഡറി സ്‌കൂളിന്റെയോ സൗകര്യവും അദ്ധ്യാപകരുടെ സഹായവും പ്രയോജനപ്പെടുത്താം. പ്രവേശന നടപടികൾ പൂർത്തിയാകുന്നതുവരെ ഹെൽപ് ഡെസ്‌ക് പ്രവർത്തിക്കും. മറ്റ് ബോർഡുകളിൽ നിന്ന് യോഗ്യത നേടിയിട്ടുള്ളവർ മൈഗ്രേഷൻ സർട്ടിഫിക്കറ്റ് ഹാജരാക്കണം. സിബിഎസ്ഇ യോഗ്യത നേടിയവരെ മുഖ്യ അലോട്മെന്റിന് ശേഷമുള്ള ഒഴിവുകളിലാണ് പരിഗണിക്കുക. എയ്ഡഡ് ഹയർസെക്കൻഡറി സ്‌കൂളുകളിലെ മാനേജ്മെന്റ് ക്വാട്ട സീറ്റുകളിലേക്കുള്ള പ്രവേശനം അതാത് സ്‌കൂൾ മാനേജ്മെന്റുകളാണ് നടത്തുന്നത്.
വിദ്യാർത്ഥികൾ ഓൺലൈനായാണ് അപേക്ഷ സമർപ്പിക്കേണ്ടത്. ഇതിനായി www.admission.dge.kerala.gov.in എന്ന വെബ്സൈറ്റ് സന്ദർശിക്കുക.
