മനുഷ്യരാശിയ്ക്ക് ഭീഷണിയായ അസുരന്മാരെ നിഗ്രഹിക്കാൻ ശ്രീ പരമേശ്വരന്റെ തൃക്കണ്ണിലെ അഗ്നിയിൽ നിന്നും അവതരിച്ച സുബ്രഹ്മണ്യ ഭഗവാന്റെ അവതാരദിനമാണ് വൈകാശി വിശാഖം. തമിഴ് കലണ്ടർ പ്രകാരം വൈകാശി മാസത്തിലെ വിശാഖം നാളിലാണ് ഗൂരപത്മാസുര നിഗ്രഹത്തിന് ആറ് മുഖമുള്ള ശിശുവായാണ് വേൽമുരുകൻ അവതരിച്ചത്.
സുരപത്മം, താരകാസുരൻ, സിംഹമുഖൻ എന്നീ രാക്ഷസന്മാരെ നശിപ്പിക്കാനാണ് മുരുകൻ അവതരിച്ചത്. ഈ അസുരന്മാർ കാലങ്ങളായിദേവന്മാരെ അടിമകളാക്കി അവർക്ക് പറഞ്ഞറിയിക്കാനാവാത്ത ദുരിതം വരുത്തിപ്പോരുകയായിരുന്നു. ദേവന്മാർ ശിവനോട് സഹായത്തിനായി അപേക്ഷിച്ചു.അവർ ഭഗവാൻ ശിവനെ ധ്യാനിച്ചു .അപ്പൊൾ അദ്ദേഹത്തിന്റെ മൂന്നാമത്തെ കണ്ണിൽ നിന്ന് ആറ് തീപ്പൊരികൾ പുറപ്പെടുകയും ചെയ്തു. അതിനാൽ അവനെ സ്കന്ദൻ എന്ന് വിളിക്കുന്നു. തീപ്പൊരി അസഹനീയമായിരുന്നതിനാൽ അഗ്നിയും വായുവും ചേർന്ന് ഗംഗാനദിയിലേക്ക് കൊണ്ടുപോയി അവരെ അവിടെ ഉപേക്ഷിച്ചു. നീർച്ചെടികളാൽ മൂടപ്പെട്ട ശരവണനെ കുളിപ്പിക്കാൻ ഗംഗ മാതാവ് അഗ്നിജ്വാലകൾ വഹിച്ചു. തീപ്പൊരികൾ രൂപാന്തരപ്പെടുകയും കുളത്തിൽ നിന്ന് വിരിഞ്ഞ ആറ് താമരകളിൽ ആറ് കുഞ്ഞുങ്ങളായി മുരുകൻ ഇവിടെ പ്രത്യക്ഷപ്പെടുകയും ചെയ്തുവെന്നാണ് വിശ്വാസം. ഈ സമയം പാർവതി ദേവി ആറ് കുഞ്ഞുങ്ങളെയും ആലിംഗനം ചെയ്യുകയും ആറ് തലകളും 12 കൈകളും ഉള്ള ഒന്നാക്കി മാറ്റുകയും ചെയ്തു. അതിനാൽ മുരുകനെ ഷൺമുഖൻ എന്ന് വിളിക്കുന്നു. സൃഷ്ടി, സംരക്ഷണം, സംഹാരം, അധിനിവേശം, പരമമായ കൃപ, ജ്ഞാനത്തിന്റെ പ്രാഥമിക ഉറവിടം എന്നിവയാണ് മുരുകന്റെ ആറ് മുഖങ്ങൾ പ്രതിനിധീകരിക്കുന്നത്. ഓം എന്ന ആദിമ പ്രപഞ്ച പദത്തിന്റെ അർത്ഥം തന്റെ പിതാവായ ശിവന് നൽകി. എല്ലാ അറിവിന്റെയും ദൈവമാണ് സുബ്രഹ്മണ്യ ഭഗവാൻ.
ശിവപുത്രൻ, പാർവതീതനയൻ, ഗണപതിയുടെ ഇളയ സഹോദരൻ, ഇന്ദ്രന്റെ മരുമകൻ, അഗസ്ത്യർക്ക് തമിഴ് വ്യാകരണം ഉപദേശിച്ച ഭഗവാൻ, അവ്വൈയാർക്ക് ഞാവർപഴത്തിലൂടെ തത്വജ്ഞാനമേകിയ ദേവൻ, പിതാവായ ശിവന് തന്നം പ്രണവമന്ത്ര പൊരുൾ ഉപദേശിച്ചവൻ എന്നിങ്ങനെ ഏറെ മഹിമകളുണ്ട് ശ്രീമുരുകന്. ഏറ്റെടുക്കുന്ന ഏത് പ്രവൃത്തിയിലും വിജയം സുനിശ്ചിതമാക്കുന്ന ദേവസേനാപതിയെ ആരാധിച്ചാൽ ഇരട്ടി ഫലം ലഭിക്കുന്ന ദിനമാണ് വൈകാശി വിശാഖ ദിനം. ഇന്നെ ദിവസം മുരുകനെ യഥാവിധി പൂജിച്ച്, വഴിപാട് നടത്തി പ്രാർത്ഥിച്ചാൽ പ്രതിസന്ധികളെ അതിജീവിച്ച് മുന്നോട്ട് പോകാൻ കഴിയും. ഓം വചത്ഭുവേ നമഃ, ഓം ശരവണ ഭവ എന്നീ മന്ത്രങ്ങൾ, സുബ്രഹ്മണ്യ ഗായത്രി, സുബ്രഹ്മണ്യ അഷ്ടോത്തരം തുടങ്ങിയവ ഈ ദിവസം ജപിക്കുന്നത് ഉത്തമമാണ്.
സുബ്രഹ്മണ്യ ഗായത്രി
ഓം സനൽകുമാരായ വിദ്മഹേ
ഷഡാനനായ ധീമഹി
തന്നഃ സ്കന്ദ പ്രചോദയാത്
ധ്യാനശ്ലോകം
1 . ‘സ്ഫുരൻമകുടപത്ര കുണ്ഡല വിഭൂഷിതം ചമ്പക-
സ്രജാകലിതകന്ധരം കരയുഗീന ശക്തിം പവിം
ദധാനമഥവാ കടീകലിതവാമഹസ്തേഷ്ടദം
ഗുഹം ഘുസൃണഭാസുരം സമരതു പീതവാസോവസം.
2 . ഷഡാനനം കുങ്കുമ രക്ത വർണം
മഹാത്ഭുതം ദിവ്യ മയൂര വാഹനം
രുദ്രസ്യ സൂനം സുരസൈന്യ നാഥം
ഗുഹം സദാഹം ശരണം പ്രപദ്യേ
സുബ്രഹ്മണ്യ ഭഗവാനിൽ ത്രിമൂർത്തികളും കുടികൊള്ളുന്നെന്നാണ് വിശ്വാസം. മുകുന്ദൻ, രുദ്രൻ, കമലോത്ഭവൻ എന്നീ ത്രിമൂർത്തികളുടെ നാമത്തിന്റെ ഏകരൂപമാണ് മുരുകൻ. അതുകൊണ്ട് തന്നെ മുരുകനെ തൊഴുത് പ്രാർത്ഥിച്ചാൽ ത്രിമൂർത്തികളെയും തൊഴുന്ന ഫലം ലഭിക്കും. ഓരോ മൂർത്തികളുടെയും അവതാര ദിവസവും , മറ്റ് പ്രധാനപ്പെട്ട ദിവസങ്ങളിലും വഴിപാടുകൾ നടത്തി പ്രാർത്ഥിച്ചാൽ ദുഃഖദുരിതങ്ങൾ അകന്ന് ഭയരഹിതമായ ജീവിതം ലഭിക്കുമെന്നാണ് ആചാര്യന്മാർ പറയുന്നത്.
വൈകാശി വിശാഖം ആചാരിക്കേണ്ടത് ഇങ്ങനെ;
അതിരാവിലം എഴുന്നേറ്റ് കുളിച്ച് ആദ്യം ഗണപതിയെ വന്ദിച്ചശേഷം മുരുകന്റെ ചിത്രത്തിന് മുൻപിൽ അഞ്ച് തിരിയിച്ച നിലവിളക്ക് കത്തിക്കുക. തുടർന്ന് അഞ്ച് സുഗന്ധദ്രവ്യങ്ങളും അഞ്ച് തരം നിവേദ്യങ്ങളും സമർപ്പിച്ച് സ്തോത്രങ്ങൾ ജപിച്ചും സുബ്രഹ്മണ്യ സ്വാമിയെ ഉപാസിച്ചാൽ ശത്രുക്കൾ നിഷ്പ്രഭരാകും. ഇന്നേ ദിവസം ക്ഷേത്രത്തിൽ പഞ്ചാമൃതാഭിഷേകം നടത്തിയാൽ അഭീഷ്ട സിദ്ധിയുണ്ടാകും. ഇളനീര് കൊണ്ട് അഭിഷേകം നടത്തിയാൽ സന്താനലബ്ധിയുണ്ടാകും.കരിമ്പിൻ നീർ കൊണ്ട് അഭിഷേകം നടത്തിയാൽ ആരോഗ്യം വർദ്ധിക്കും. മോര്, പാനകം, തൈര് ചോറ്, ഇളനീർ എന്നിവ ദാനം ചെയ്താൽ തലമുറകൾക്ക് അഭിവൃദ്ധിയുണ്ടാകും. ‘ഓ ശരവണ ഭവ’ എന്ന മുരുകന്റെ മൂലമന്ത്രം സർവ്വ ദോഷസംഹാരിയാണ്..
പ്രധാനമായും തമിഴ് ഉത്സവമാണ് വൈകാശി വിശാഖം. തമിഴ് നാട്ടിലെ മുരുക മഹാക്ഷേത്രങ്ങളായ ആറു പടൈ വീടുകളിൽ ഈ ഉത്സവം ആചാരപരമായി ആഘോഷിക്കുന്നു.(തിരുത്തണി മുരുകൻ ക്ഷേത്രം, സ്വാമിമലൈ മുരുകൻ ക്ഷേത്രം, പഴനി മുരുകൻ ക്ഷേത്രം, പഴമുതിർചോലൈ മുരുകൻ ക്ഷേത്രം, തിരുപ്പറങ്കുൻറം മുരുകൻ ക്ഷേത്രം, തിരുച്ചെന്തൂർ മുരുകൻ ക്ഷേത്രം എന്നിവയാണ് മുരുകന്റെ ആറുപടൈവീടുകൾ എന്ന് അറിയപ്പെടുന്ന ആറു ക്ഷേത്രങ്ങൾ)
Comments