ശാസ്ത്രലോകത്തെ ഞെട്ടിച്ച് ഇണ ചേരാതെ സ്വയം ഗർഭിണിയായി മുതല. കോസ്റ്റാറിക്കയിലെ മൃഗശാലയിലാണ് ഈ അപൂർവ സംഭവം റിപ്പോർട്ട് ചെയ്തിരിക്കുന്നത്. ഗർഭിണിയായ മുതലയ്‌ക്ക് 18 വയസുണ്ട്. ഭ്രൂണത്തിന് അമ്മ മുതലയുമായി 99.9 ശതമാനം ജനതക സാമ്യമുണ്ടെന്ന് ഡിഎൻഎ പരിശോധനയിൽ കണ്ടെത്തിയിരുന്നു. ‘വെർജിൻ ബെർത്ത്’ എന്നാണ് ഇതിനെ വിശേഷിപ്പിച്ചത്.
രണ്ട് വയസുള്ളപ്പോഴാണ് ഈ മുതല അമേരിക്കയിൽ നിന്നെത്തിയത്. മറ്റ് മുതലകൾക്കൊപ്പം കൂടാതെ ഒറ്റയ്‌ക്കായിരുന്നു താമസം. മുട്ടയിട്ട് മൂന്ന് മാസം കഴിഞ്ഞാണ് മൃഗശാലയിലെ ജീവനക്കാർ അറിഞ്ഞത്. പതിനാല് മുട്ടകളിൽ ഒരെണ്ണം പൂർണ വളർച്ചയെത്തിയിരുന്നെങ്കിലും ജീവനോടെ കിട്ടിയില്ല.
ഇണ ചേരാതെ തന്നെ കുഞ്ഞുങ്ങളുണ്ടാകുന്ന പ്രതിഭാസത്തെ ‘പാർത്തനോജെനസിസ്’ എന്നാണ് ശാസ്ത്രലോകം വിളിക്കുന്നത്. ഇത്തരത്തിൽ സ്രാവ്, പക്ഷികൾ, പാമ്പുകൾ, പല്ലി എന്നിവയ്‌ക്കും ചില സമയങ്ങളിൽ ഇണ ചേരാതെ കുഞ്ഞുണ്ടാകാറുണ്ട്. വെർജിൻ ബെർത്തിനെ കുറിച്ച് ബയോളജി ലെറ്റേഴ്‌സ് എന്ന് ജേണലിലും പഠനം പ്രസിദ്ധീകരിച്ചിട്ടുണ്ട്.
