ഇന്ത്യൻ സൈനിക വാഹനങ്ങൾ എന്ന് കേൾക്കുമ്പോൾ നമ്മുടെ മനസ്സിലേയ്‌ക്ക് ഓടിയെത്തുന്നത് ശക്തമായ ടാങ്കുകളും ട്രക്കുകളും ബുള്ളറ്റുകളുമൊക്കെയാണ്. ഏത് പ്രതിസന്ധി ഘട്ടങ്ങളിലും ഓടിയെത്തുന്നവയാണ് ഇന്ത്യൻ ആർമിയുടെ വാഹനങ്ങൾ. സൈന്യത്തിന് വേണ്ടി പ്രത്യേകം നിർമ്മിക്കപ്പെട്ടവയാണ് അവ. എന്നാൽ, ഇന്ത്യൻ വിപണിയിൽ പെർഫോർമൻസ് കൊണ്ട് കരുത്ത് തെളിയിച്ച സിവിലിയൻ വാഹനങ്ങളും ഇന്ത്യൻ സൈന്യത്തിന്റെ ഭാഗമാകാറുണ്ട്. ഇത്തരം വാഹനങ്ങളെ സൈന്യത്തിന് ആവശ്യമായ തരത്തിൽ നിർമ്മിക്കുകയാണ് പതിവ്. ഇങ്ങനെ, ഇന്ത്യൻ വാഹന വിപണിയിൽ തിളങ്ങുകയും പിന്നീട് ഇന്ത്യൻ സേനയുടെ ഭാഗവുമായ അഞ്ച് വാഹനങ്ങൾ ഏതൊക്കെയാണെന്ന് നോക്കാം.
ഹിന്ദുസ്ഥാൻ അംബാസഡർ
ഇന്ത്യയുടെ ഐക്കണിക്ക് കാറായ ഹിന്ദുസ്ഥാൻ അംബാസഡർ ആണ് ആദ്യത്തേത്. ദശാബ്ദങ്ങളോളം ഇന്ത്യൻ നിരത്തുകൾ അടക്കിവാണ വാഹന രാജാവാണ് അംബാസഡർ. ഇന്നും വാഹനപ്രേമികൾക്കിടയിൽ രാജകീയ പദവി അലങ്കരിക്കുന്ന വാഹനം. ഇന്ത്യയിലെ മന്ത്രിമാരുടെയും രാഷ്‌ട്രീയ നേതാക്കളുടെയും ട്രേഡ്മാർക്ക് വാഹനമായിരുന്നു അംബാസഡർ. ഹിന്ദുസ്ഥാൻ അംബാസഡർ ഇന്ത്യൻ ആർമിയുടെയും ഭാഗമായിരുന്നു. യുദ്ധകാല ആവശ്യങ്ങൾക്കായിരുന്നില്ല വാഹനം ഓടിയിരുന്നത്. ഉദ്യോഗസ്ഥർക്ക് പൊതുവായി സഞ്ചരിക്കാനുള്ള വാഹനമായിട്ടാണ് അംബാസഡറിനെ സേനയുടെ ഭാഗമാക്കിയത്. 2014-ൽ കാറിന്റെ നിർമ്മാണം അവസാനിച്ചിരുന്നു. ഇപ്പോഴും സേനയുടെ ഭാഗമായി അംബാസഡർ ഉപയോഗിച്ചു വരുന്നു.
മാരുതി സുസുക്കി ജിപ്സി
ഇന്ത്യൻ സേനയുടെ അവിഭാജ്യ വാഹനമെന്നോണം മാരുതി സുസുക്കി ജിപ്സി ഉപയോഗിച്ചു വരുന്നു. 1991-ലാണ് മാരുതി സുസുക്കി ജിപ്സി ഇന്ത്യൻ സേനയുടെ ഭാഗമായത്. എത്രപേർ ശ്രദ്ധിച്ചിട്ടുണ്ടെന്ന് അറിയില്ല, മിക്ക സിനിമകളിലും പട്ടാള വേഷത്തിലെത്തുന്ന കഥാപാത്രം സഞ്ചരിക്കുന്നത് ജിപ്‌സിയിലാണ്. മലമുകളിലും മരുഭൂമികളിലും ഉൾപ്പെടെ എവിടെയും ഓടിയെത്താൻ കരുത്തുള്ള വാഹനമാണ് ജിപ്സി. അതുതന്നെയാണ് സേനയുടെ ഇഷ്ട വാഹനമായി ജിപ്സി മാറാൻ കാരണം. അന്ന് മുതൽ ഇന്നു വരെ ജിപ്സി നമ്മുടെ സൈന്യത്തിന്റെ ഭാഗമാണ്.
ടാറ്റാ സുമോ 4X4
പ്രധാനമായും ഇന്ത്യൻ സേനയുടെ മെഡിക്കൽ ആവശ്യങ്ങൾക്കുവേണ്ടി ഉപയോഗിക്കുന്ന വാഹനമാണ് ടാറ്റയുടെ ഫോർവീൽ ഡ്രൈവുള്ള സുമോ. യുദ്ധമുഖങ്ങളിലും അടിയന്തര സാഹചര്യങ്ങളിലും ആംബുലൻസായി ടാറ്റ സുമോ മാറുന്നു. ഏതു വലിയ പ്രതിസന്ധി ഘട്ടങ്ങളെയും തരണം ചെയ്ത് മുന്നോട്ട് കുതിക്കാൻ കഴിയുന്ന വാഹനമാണ് ഫോർവീൽ ടാറ്റാ സുമോ. സൈന്യത്തിൽ സേവനം കഴിഞ്ഞെത്തുന്ന സുമോയ്‌ക്ക് ആരാധകരേറെയാണ്.
ടാറ്റ മോട്ടോഴ്‌സ് സഫാരി സ്റ്റോം
ഇന്ത്യൻ ആർമി കമ്മീഷൻ ചെയ്ത ടാറ്റ സഫാരി സ്റ്റോം എസ്‌യുവിയുടെ ഏറ്റവും ശക്തമായ വാഹനമാണ്. ഇന്ത്യയിലെ ആദ്യ ബിഗ്‌സൈസ് എസ്‌യുവിയാണ് സഫാരി സ്റ്റോം. 3192 സഫാരി സ്റ്റോം ജിഎസ്800 മോഡലുകൾ ടാറ്റയിൽ നിന്നും തുടക്കത്തിൽ തന്നെ ഇന്ത്യൻ സേന വാങ്ങി. പുറത്തു വിൽപനയിലുള്ള മോഡലുകളെക്കാൾ ജിഎസ്800 എന്ന എൻജിന്റെ കരുത്ത് വർദ്ധിപ്പിച്ച് ട്യൂൺ ചെയ്താണ് ഇന്ത്യൻ ആർമിക്ക് വേണ്ടി സഫാരി സ്റ്റോം നിർമ്മിച്ചിരിക്കുന്നത്. ഇന്നും GS800 മോഡലുകൾ ഇന്ത്യൻ ആർമിയിൽ കാണാൻ സാധിക്കും.
മഹീന്ദ്ര സ്കോർപിയോ 4X4
ഇപ്പോൾ പൊതുജനങ്ങൾക്കായി സ്കോർപിയോ ക്ലാസികിന്റെ പരിമിതമായ വേരിയന്റുകൾ മാത്രമേ വിൽക്കുന്നുള്ളൂ. എന്നാൽ, അടുത്തിടെ 1,470 സ്കോർപിയോ എസ്‍യുവികളാണ് മഹീന്ദ്രയിൽ നിന്നും ഇന്ത്യൻ ആർമി ഓർഡർ ചെയ്തിരിക്കുന്നത്. 4×4 സിസ്റ്റമായിരിക്കും ഇവയ്‌ക്ക്. 2.2 ലിറ്റർ ഡീസൽ എഞ്ചിൻ 140 എച്ച്പി ഉത്പാദിപ്പിക്കുമെന്നാണ് റിപ്പോർട്ടുകൾ.
Comments