മുംബൈ: മഹാരാഷ്ട്രയിൽ കെട്ടിടത്തിന്റെ നാലാം നിലയിൽ നിന്നും വീണ നാല് വയസുകാരി അത്ഭുതകരമായി രക്ഷപ്പെട്ടു. മഹാരാഷ്ട്രയിലെ പാൽഘർ ജില്ലയിലാണ് സംഭവം. ബാൽക്കണിയിൽ നിന്നും കാൽ വഴുതി വീണ പെൺകുട്ടി താഴത്തെ നിലയിൽ വിശ്രമിക്കുകയായിരുന്ന യുവാവിന്റെ മടിയിലേക്ക് വീണ് അത്ഭുതകരമായി രക്ഷപ്പെടുകയായിരുന്നു.
ഇക്കഴിഞ്ഞ ജൂൺ എട്ടിന് രാത്രി ഒൻപത് മണിയോടെയായിരുന്നു സംഭവം. നാലാം നിലയിൽ നിന്നിരുന്ന ദേവാഷി സഹാനി എന്ന കുട്ടി ഒന്നാം നിലയിൽ നിന്നും കാൽ വഴുതി വീഴുകയായിരുന്നു. കെട്ടിടത്തിന്റെ അറ്റകുറ്റപ്പണികൾ നടക്കവെയായിരുന്നു അപകടം. രാത്രി ഒമ്പത് മണിയോടെ അപ്പാർട്ട്മെന്റിൽ നിന്നും പുറത്തിറങ്ങിയ കുട്ടി ബാൽക്കണിയിൽ നിന്നും താഴേക്ക് വീഴുകയായിരുന്നു. എന്നാൽ കുട്ടി വന്നു വീണത് താഴത്തെ നിലയിലായി ഇരുന്നിരുന്ന യുവാവിന്റെ മടിയിലേക്കായിരുന്നു.
ബാൽക്കണിയിലെ നിർമ്മാണ വസ്തുക്കളിൽ തട്ടിയാണ് കുട്ടി താഴേക്ക് വീണത്. കുട്ടിയെ ഉടൻ തന്നെ ആശുപത്രിയിൽ എത്തിച്ചു. തലയിൽ പരിക്കുപറ്റിയ പെൺകുട്ടിയെ ആശുപത്രിയിൽ പ്രവേശിപ്പിച്ചെങ്കിലും പിന്നീട് ഡിസ്ചാർജ് ചെയ്തു. യുവാവിനും ചെറിയ തോതിൽ പരിക്കു പറ്റിയിരുന്നു.
Comments