പ്രഭുദേവയ്‌ക്കും ഭാര്യ ഹിമാനിക്കും പെൺകുഞ്ഞ് ജനിച്ചു. അമ്പതാമത്തെ വയസിൽ വീണ്ടും അച്ഛനായെന്ന വാർത്ത സത്യമാണെന്ന് പ്രഭുദേവ തന്നെയാണ് അറിയിച്ചത്. വളരെ സന്തോഷമുണ്ടെന്നും പൂർണനായെന്ന് തോന്നുന്നതായും പ്രഭുദേവ പറഞ്ഞു.
വളരെ രഹസ്യമായിട്ടായിരുന്നു പ്രഭുദേവയുടെയും ഹിമാനിയുടെയും വിവാഹം നടന്നത്. നടന്റെ രണ്ടാം വിവാഹത്തെ കുറിച്ച് പുറംലോകത്തെ അറിയിച്ചത് താരത്തിന്റെ സഹോദരന്‍ രാജു സുന്ദര്‍ ആയിരുന്നു. ബിഹാര്‍ സ്വദേശിയായ ഹിമാനി ഫിസിയോതെറാപ്പിസ്റ്റാണ്. തുടര്‍ച്ചയായി നൃത്തം ചെയ്യുന്നതിനാല്‍ പ്രഭുദേവയ്‌ക്ക് പുറംവേദന ഉണ്ടായിരുന്നു. ചികിത്സയുടെ ഭാഗമായാണ് താരം മുംബൈയില്‍ വെച്ച് ഹിമാനിയെ കണ്ടുമുട്ടിയത്. ഇരുവരുടെയും സൗഹൃദം പിന്നീട് പ്രണയത്തിലെത്തുകയും ഒന്നിച്ച് ജീവിക്കാന്‍ തീരുമാനിക്കുകയുമായിരുന്നു. ലോക്ഡൗണ്‍ പ്രഖ്യാപിച്ചതോടെ മുംബൈയില്‍ നിന്ന് ഇരുവരും ചെന്നൈയിലേക്ക് താമസം മാറ്റിയിരുന്നു.
റംലത്താണ് പ്രഭുദേവയുടെ ആദ്യഭാര്യ. വിശാൽ, റിഷി രാഘവേന്ദ്ര ദേവ, ആദിത് ദേവ എന്നിങ്ങനെ മൂന്ന് ആൺമക്കളായിരുന്നു ഈ ബന്ധത്തിൽ പ്രഭുദേവയ്‌ക്കുള്ളത്. ഇതിൽ വിശാൽ 2008-ൽ അന്തരിച്ചു. ഇതിന് പിന്നാലെ 2010-ൽ റംലത്തും പ്രഭുദേവയും വേർപിരിഞ്ഞു.
