കണ്ണൂർ: കേരളത്തിലെ അഗ്നിപഥ് റിക്രൂട്ട്മെന്റ് റാലി നാളെ നടക്കും. വടക്കൻ കേരളത്തിലെ ഏഴ് ജില്ലകളിൽ നിന്നുള്ളവർക്കും ലക്ഷദ്വീപ്, മാഹി നിവാസികൾക്കുമായാണ് അഗ്നിപഥ് റിക്രൂട്ട്മെന്റ് റാലി സംഘടിപ്പിക്കുന്നത്. കണ്ണൂർ തലശേരി മുൻസിപ്പൽ സ്റ്റേഡിയത്തിൽ ജൂൺ 15 മുതൽ 20 വരെയാകും റാലി നടക്കുക.
കരസേനയിലേക്ക് ജനറൽ ഡ്യൂട്ടി, ടെക്നിക്കൽ, ട്രേഡ്സ്മാൻ(പത്താം ക്ലാസ് വിജയിച്ചവർ), ട്രേഡ്സ്മാൻ (എട്ടാം ക്ലാസ് വിജയിച്ചവർ), ക്ലർക്ക്/ സ്റ്റോർ കീപ്പർ വിഭാഗങ്ങളിലേക്ക് അഗ്നിവീറുകളെ തിരഞ്ഞെടുക്കുന്നതിനായാണ് റാലി. പൊതുപ്രവേശന എഴുത്തുപരീക്ഷയിൽ നിന്ന് ഷോർട്ട് ലിസ്റ്റ് ചെയ്യപ്പെട്ടവർക്ക് റാലിയിൽ പങ്കെടുക്കാവുന്നതാണ്.
https://www.joinindianarmy.nic.in എന്ന വെബ്സൈറ്റിൽ പൊതുപ്രേവശന പരീക്ഷയുടെ ഫലം പ്രസിദ്ധീകരിച്ചിട്ടുണ്ട്. ഷോർട്ട് ലിസ്റ്റ് ചെയ്യപ്പെട്ടവരുടെ അഡ്മിറ്റ് കാർഡ് ഇ-മെയിലിൽ അയക്കുന്നതാണ്. ഉദ്യോഗാർത്ഥികൾക്ക് വെബ്സൈറ്റിൽ പ്രൊഫൈലിൽ ലോഗിൻ ചെയ്തും അഡ്മിറ്റ് കാർഡുകൾ ഡൗൺലോഡ് ചെയ്യാമെന്ന് കോഴിക്കോട് ആർമി റിക്രൂട്ടിംഗ് ഓഫീസ് അറിയിച്ചു.
