ജീവിതത്തിൽ ഏറെ പ്രാധാന്യമുള്ള ദിവസമെന്ന് കരുതി ഏതൊരാളും സ്വപ്നം കാണുന്ന ദിവസമാണ് വിവാഹദിനം. എന്നും ഓർമ്മയിൽ നിൽക്കുന്നതിനായി പറ്റുന്ന തരത്തിൽ വ്യത്യസ്തമാക്കാനും മനോഹരമാക്കാനും ഓരോ വധൂ വരന്മാരും ശ്രമിക്കാറുണ്ട്. സേവ് ദ ഡേറ്റിൽ തുടങ്ങി വിവാഹത്തിന്റെ വീഡിയോകൾ വ്യത്യസ്ത രീതിയിലാണ് സമൂഹമാദ്ധ്യമങ്ങളിൽ പ്രചരിക്കുന്നത്. ഇപ്പോഴിതാ പതിവ് രീതികളിൽ നിന്നും വ്യത്യസ്തമായൊരു വിവാഹ വീഡിയോ ആണ് സമൂഹമാദ്ധ്യമങ്ങളിൽ വൈറലായിരിക്കുന്നത്.
സാധാരണ നിലയിൽ വില കൂടിയ കാറിലും ബൈക്കിലുമൊക്കെ ട്രെൻഡിനൊപ്പമാണ് വിവാഹദിനത്തിൽ വരൻ എത്താറുള്ളത്. എന്നാൽ പതിവ് രീതികളിൽ നിന്നും മാറിയായിരുന്നു രാജസ്ഥാനിലെ വിവാഹം. വിവാഹത്തിന് വരൻ എത്തിയത് കാറിലോ ബൈക്കിലോ ഒന്നുമായിരുന്നില്ല, ട്രാക്ടറിലായിരുന്നു. വരൻ മാത്രമായിരുന്നില്ല ഒപ്പമുണ്ടായിരുന്നവരും ട്രാക്ടറിലാണ് ചടങ്ങിൽ പങ്കെടുക്കുന്നതിനായി എത്തിയത്. 51 ട്രാക്ടറുകളിലാണ് വരനും ബന്ധുമിത്രാധികളും എത്തിയത്. വരൻ തന്നെയായിരുന്നു ട്രാക്ടർ ഓടിച്ചത്.
അച്ഛന്റെ ആഗ്രഹത്തിന് അനുസൃതമായാണ് വിവാഹദിനത്തിൽ വാഹനമായി വരൻ ട്രാക്ടർ തിരഞ്ഞെടുത്തത്. ‘എന്റെ അച്ഛനും അച്ഛന്റെ അച്ഛനും ഒട്ടത്തിലായിരുന്നു വിവാഹ ദിനത്തിൽ പോയത്. ഞാൻ ട്രാക്ടറിലായിരുന്നു പോയത്. അതുകൊണ്ട് എന്റെ മകന് വേണ്ടി ഞാൻ ട്രാക്ടർ തിരഞ്ഞെടുക്കുകയായിരുന്നു. എന്റെ കുടുംബത്തിന്റെ പ്രധാന തൊഴിൽ കൃഷിയാണ്. എല്ലാവരും കൃഷിക്കാരാണ്. അതുകൊണ്ട് തന്നെ ട്രാക്ടർ ഒരു കർഷകന്റെ അംഗീകരാമായി കണക്കാക്കപ്പെടുന്നു. അങ്ങനെയാണ് ട്രാക്ടർ ഉപയോഗിക്കാമെന്ന തീരുമാനത്തിൽ എത്തിയത്. തന്റെ കുടുംബത്തിൽ 20-30 ട്രാക്ടറുകൾ ഉണ്ട്. കൂടാതെ കർഷക സുഹൃത്തുക്കളിൽ നിന്നും ബാക്കി ട്രാക്ടറുകളും സംഘടിപ്പിച്ചു. ‘-എന്ന് വരന്റെ അച്ഛൻ ജേതാറാം വ്യക്തമാക്കി.
ഗുഡമാലിനി ഗ്രാമത്തിൽ നിന്നുള്ള പ്രകാശ് ചൗധരിയും റോളി ഗ്രാമത്തിലെ മമതയും ഈ കഴിഞ്ഞ തിങ്കളാഴ്ചയായിരുന്നു വിവാഹിതരായത്. തിങ്കളാഴ്ച രാവിലെ വരന്റെ വീട്ടിൽ നിന്നും ഘോഷയാത്രയായി 51 കിലോമീറ്റർ അകലെയുള്ള റോളി ഗ്രാമത്തിലേക്ക് ട്രാക്ടറിൽ പുറപ്പെടുകയായിരുന്നു. 51 ട്രാക്ടറുകളിലായി 200-ൽ അധികം ആളുകളാണ് ഉണ്ടായിരുന്നത്. തങ്ങൾ ട്രാക്ടറിൽ വധുവിന്റെ വീട്ടിലേക്ക് എത്തിയപ്പോൾ എല്ലാവരും അമ്പരന്നുവെന്ന് വരന്റെ പിതാവ് പറഞ്ഞു.
Comments