ചായ പ്രേമികൾ ഏറെയാണ്. ഒരു നേരമെങ്കിലും ചായ കുടിക്കാത്തവരായി ആരുമില്ല. മധുരം കൂട്ടിയും കടുപ്പത്തിലും കടുപ്പമില്ലാതെയും അങ്ങനെ ചായയുടെ പല രുചിഭേദങ്ങൾ. എന്നാൽ ആത്മസംതൃപ്തിയോടെയും സന്തോഷത്തോടെയും കൂടി കുടിയ്ക്കുന്ന ചായയുടെ പിന്നിലൊരു ദോഷവശം കൂടിയുണ്ട്. അമിതമായി ചായ കുടിക്കുന്നത് പല്ലിന് വളരെ ദോഷകരമായി ബാധിക്കും. പല്ലിൽ കറ ഉണ്ടാകുകയും ചെറിയ സുഷിരങ്ങൾ വീഴ്ന്ന് ദ്രവിക്കുകയും ചെയ്യുന്നു. സ്ഥിരമായി ചായ കുടിക്കുന്നത് പല്ലിന്റെ സ്വാഭാവികതയെ ബാധിക്കുമെന്നാണ് പഠനങ്ങൾ പറയുന്നത്.
ചായയ്ക്ക് നിറം നൽകാൻ തേയിലയിൽ ഉപയോഗിക്കുന്ന മഞ്ഞ അല്ലെങ്കിൽ തവിട്ട് നിറമുള്ള പദാർത്ഥങ്ങളാണ് ടാനിൻ. എന്നാലിത് ഗുണത്തേക്കാൾ ദോഷമാണ് നൽകുന്നത്. ചായയിൽ അടങ്ങിയിരിക്കുന്ന ടാനിൻ എന്ന പദാർത്ഥം പല്ലിനെ കാലക്രമേണ പൂർണമായും നശിപ്പിക്കാൻ സാധ്യതയുണ്ട്. ഇത് പല്ലിന്റെ നിറത്തെ നശിപ്പിക്കുകയും ചെയ്യും.
ചായയിൽ ഉപയോഗിക്കുന്ന പഞ്ചസാരയും പല്ലിന്റെ ആരോഗ്യത്തെ സാരമായി ബാധിക്കുന്ന പദാർത്ഥമാണ്. പഞ്ചസാരയുടെ അമിതമായ ഉപയോഗം മറ്റ് അസുഖങ്ങൾ ഉണ്ടാക്കുന്നതിന് പുറമേ പല്ലിനെയും സാരമായി ബാധിക്കാറുണ്ട്. പല്ലിന് കേടുപാടുകൾ വരുത്തുകയും പല്ല് ദ്രവിക്കാൻ കാരണമാകുകയും ചെയ്യുന്നു.
എന്നാൽ ചായയ്ക്ക് പകരമായി ഗ്രീൻ ടീ കുടിക്കുകയാണെങ്കിൽ അത് പല്ലിന്റെ ആരോഗ്യത്തിന് ഗുണം ചെയ്യും. ഗ്രീൻ ടീയിൽ അടങ്ങിയിരിക്കുന്ന ഫ്ലൂറൈഡ് ദന്തക്ഷയം തടയാൻ സഹായിക്കും. ഗ്രീൻ ടീ ഹൃദ്രോഗം, പ്രമേഹം എന്നീ രോഗങ്ങളുടെ സാധ്യത കുറയ്ക്കാൻ കഴിയും.
