കേരളാ പോലീസ് ഏറ്റവും മാതൃകപരമായ പോലീസ്; പോക്‌സോ കേസിലെ പ്രതിയെ അറസ്റ്റ് ചെയ്തിട്ടില്ല!; ഗവൺമെന്റിന് ആരെയും വേട്ടയാടണമെന്നില്ല: എ.എ റഹീം

തിരുവനന്തപുരം: കേരളാ പോലീസ് ഇന്ത്യയിലെ ഏറ്റവും മാതൃകപരമായ പോലീസാണെന്ന് എ.എ റഹീം. വ്യാജ രേഖാ കേസിൽ നിഖിൽ തോമസിനെ അറസ്റ്റ് ചെയ്യാൻ വൈകുന്നതിനെപ്പറ്റിയുള്ള മാദ്ധ്യമങ്ങളുടെ ചോദ്യത്തോട് പ്രതികരിക്കുകയായിരുന്നു അദ്ദേഹം. ഏഷ്യാനെറ്റിലെ മാദ്ധ്യമ പ്രവർത്തകനെ പോക്സോ കേസിൽ പ്രതി ചേർത്തിട്ടുണ്ട്. പോക്‌സോ കേസിലെ പ്രതിയേയും പോലീസ് അറസ്റ്റ് ചെയ്തിട്ടില്ല. കുറ്റം പറയുന്നവർ അതുകൂടി പറയണം. അന്വേഷണമാവുമ്പോൾ ചിലപ്പോൾ നീണ്ടു പോകുമെന്നും എ.എ റഹീം ന്യായീകരിച്ചു. നിഖിൽ തോമസിനെ എന്തുകൊണ്ട് പിടിക്കുന്നില്ല എന്ന ചോദ്യത്തിനായിരുന്നു ഉരുണ്ടു കളിച്ചുകൊണ്ടുള്ള റഹീമിന്റെ ഉത്തരം.

കേരളാ പോലീസ് മോശമാണ് എന്നാണ് പലരും പറയുന്നത്. ചില പ്രതികളെ പിടിക്കുന്നു ചിലരെ പിടിക്കുന്നില്ല എന്നതാണ് പരാതി. കേരളാ പോലീസ് ഇന്ത്യയിലെ ഏറ്റവും മാതൃകപരമായ പോലീസാണ്. ശക്തനായ മോൻസൻ മാവുങ്കലിനെ കേരളാ പോലീസ് പിടിച്ചു. കോടതിയിൽ ഇരയ്‌ക്ക് നീതി ലഭിച്ചു. കേരളാ പോലീസിന്റെ കഴിവ് അല്ലേ ഇത്. പോലീസിന്റെ അന്വേഷണം ചിലപ്പോൾ നീണ്ടു പോയെന്നിരിക്കും. എകെജി സെന്റർ അക്രമിച്ച കേസിലെ പ്രതിയെ എത്ര നാളുകൾക്ക് ശേഷമാണ് അറസ്റ്റ് ചെയ്യാൻ പോലീസിന് കഴിഞ്ഞത്.

അന്വേഷണം ചിലപ്പോൾ നീണ്ടു പോയെന്നിരിക്കും. സെലക്ടീവായാണ് മാദ്ധ്യമങ്ങൾ ചോദ്യങ്ങൾ ഉന്നയിക്കുന്നത്. സർക്കാർ വിരുദ്ധതയാണ് മാദ്ധ്യമങ്ങൾക്കുള്ളത്. ഗവൺമെന്റിന് ആരെയും വേട്ടയാടണമെന്നില്ല. തെളിവുകളുടെ അടിസ്ഥാനത്തിലാണ് കേസുകളെടുക്കുന്നത്. സർക്കാരിനെ എതിർക്കാൻ വേണ്ടുന്ന വിഭങ്ങൾ മാത്രമാണ് മാദ്ധ്യമങ്ങൾ തിരഞ്ഞെടുക്കുന്നത്. അങ്ങനെ എടുക്കരുത്. അത് ശരിയായ മാദ്ധ്യമ പ്രവർത്തനമല്ല. നിഖിലിന്റെ അറസ്റ്റ് ഉണ്ടാകാത്തത് പ്രതിയ കണ്ടെത്താത്തത് കൊണ്ടാണ്. പല കാര്യങ്ങളിലും പോലീസ് വൈകി പോകാറുണ്ട്- എന്നും എ.എ റഹീം പറഞ്ഞു.