ന്യൂഡൽഹി: മെട്രോ യാത്രയ്ക്കിടെ യാത്രക്കാരുമായി സംവദിച്ച് പ്രധാനമന്ത്രി നരേന്ദ്രമോദി. ഡൽഹി സർവകലാശാലയുടെ ശതാബ്ദി ആഘോഷത്തിൽ പങ്കെടുക്കാൻ മെട്രോയിൽ യാത്ര ചെയ്യവെയാണ് പ്രധാനമന്ത്രി യാത്രക്കാരുമായി സംവദിച്ചത്. യാത്രക്കാരായ കുട്ടികളോടും പ്രധാനമന്ത്രി സംസാരിച്ചു. യാത്രക്കാരുമായി സംവദിക്കുന്ന ദൃശ്യങ്ങൾ ഇതിനോടകം സാമൂഹ്യമാദ്ധ്യമങ്ങളിൽ പ്രചരിക്കുകയാണ്.
‘എന്തെങ്കിലും പറയാൻ ആഗ്രഹിക്കുന്നുവെങ്കിൽ പങ്കിടാൻ പ്രധാനമന്ത്രി യാത്രക്കാരോട് ആവശ്യപ്പെട്ടു. മാനസികമായുണ്ടാകുന്ന ബുദ്ധിമുട്ടുകളും പിരിമുറുക്കവും എങ്ങനെ നേരിടാം എന്നതിനെ കുറിച്ച് പ്രധാനമന്ത്രി യാത്രക്കാർക്ക് നിർദ്ദേശം നൽകി. യുപിഐ ഇടപാടുകളുടെ വർദ്ധിച്ചുവരുന്ന ഉപയോഗത്തിന്റെ നല്ല വശങ്ങളെ കുറിച്ചും വ്യത്യസ്ത സാമ്പത്തിക സംരംഭങ്ങളെയും നയങ്ങളെയും കുറിച്ചുള്ള ചർച്ചകളും പ്രധാനമന്ത്രിയുടെ സംവാദത്തിൽ ഉൾപ്പെട്ടിരുന്നു.
യാത്രക്കാരോടൊപ്പമുള്ള ചിത്രങ്ങളും വീഡിയോകളും പ്രധാനമന്ത്രി ട്വിറ്ററിലൂടെ പങ്കുവെച്ചു. യുവാക്കൾ എന്റെ സഹയാത്രികരായതിൽ സന്തോഷമുണ്ടെന്ന് അദ്ദേഹം ട്വിറ്ററിൽ കുറിച്ചു. സഹപ്രവർത്തകർക്കൊപ്പം യാത്ര ചെയ്യുമ്പോൾ കാമ്പസിലേക്കുള്ള വരവ് കൂടുതൽ സന്തോഷകരമായിരുന്നെന്ന് ഡിയുവിൽ നടന്ന ചടങ്ങിനെ അഭിസംബോധന ചെയ്യവെ പ്രധാനമന്ത്രി പറഞ്ഞു.
