മുംബൈ: എംപി സുനിൽ തട്കരെയെ എൻസിപിയുടെ സംസ്ഥാന യൂണിറ്റ് ചീഫായി പ്രഖ്യാപിച്ച് അജിത് പവാർ പക്ഷം. തിങ്കളാഴ്ച വൈകിട്ട് സംഘടിപ്പിച്ച വാർത്താ സമ്മേളനത്തിലാണ് ഇതുസംബന്ധിച്ച പ്രഖ്യാപനം നടത്തിയത്. സംസ്ഥാന അദ്ധ്യക്ഷ പദവിയിൽ നിന്നും ജയന്ത് പാട്ടീലിനെ മാറ്റിയെന്നും പകരം സുനിൽ തട്കരെയെ നിയോഗിച്ചുവെന്നും മുതിർന്ന എൻസിപി നേതാവ് പ്രഫുൽ പട്ടേലാണ് പ്രഖ്യാപിച്ചത്. മഹാരാഷ്‌ട്രയിലെ എൻസിപിയുമായി ബന്ധപ്പെട്ട എല്ലാ കാര്യങ്ങളും ഇനിമുതൽ സുനിൽ തട്കരെ തീരുമാനിക്കുമെന്നും പ്രഫുൽ പട്ടേൽ അറിയിച്ചു.
എൻസിപിയെ നയിക്കുന്നതിനായി ഐകകണ്‌ഠേന ഏവരും തിരഞ്ഞെടുത്തത് അജിത് പവാറിനെയാണെന്നും ഇക്കാര്യം മഹാരാഷ്ട്ര നിയമസഭാ സ്പീക്കറെ അറിയിച്ചിട്ടുണ്ടെന്നും പ്രഫുൽ പട്ടേൽ പറഞ്ഞു. അതേസമയം എൻസിപിയുടെ ദേശീയ വർക്കിംഗ് പ്രസിഡന്റായ സുപ്രിയ സുലേ എംപിമാരെ അയോഗ്യരാക്കുന്നതിനുള്ള നടപടികൾ ആരംഭിച്ച് കഴിഞ്ഞു. അജിത് പവാർ പക്ഷം എൻഡിഎയ്‌ക്ക് പിന്തുണ പ്രഖ്യാപിച്ചത് പാർട്ടി വിരുദ്ധ സമീപനമാണെന്ന് ചൂണ്ടിക്കാട്ടിയാണ് നടപടി.
