ഈ വർഷം ഏറെ പ്രതീക്ഷയോടെ കാത്തിരിക്കുന്ന ഇന്ത്യൻ ചിത്രങ്ങളിലൊന്നാണ് പ്രശാന്ത് നീൽ സംവിധാനം ചെയ്യുന്ന ‘സലാർ’. നായകനായി എത്തുന്നത് പ്രഭാസ് ആയതിനാൽ സിനിമ പ്രഖ്യാപിച്ചത് മുതൽ ചിത്രത്തെ കുറിച്ചുള്ള ഈ ചിത്രത്തെ കുറിച്ചുള്ള അപ്ഡേറ്റുകൾ അറിയാൻ പ്രേക്ഷകർ ആകാംക്ഷയോടെ കാത്തിരിക്കുകയാണ്. ഇപ്പോഴിതാ ചിത്രത്തിന്റെ സുപ്രധാന അപ്ഡേറ്റ് പുറത്തുവിട്ടിരിക്കുകയാണ് അണിയറപ്രവർത്തകർ. സലാർ ടീസർ റിലീസ് ഡേറ്റാണ് പുറത്തുവിട്ടിരിക്കുന്നത്. ജൂലെെ ആറിന് പുലർച്ചെ 5.12-ന് ടീസർ റിലീസ് ചെയ്യും. ഹോംബാലെ ഫിലിംസിന്റെ യൂട്യൂബ് ചാനലിലൂടെയാണ് ടീസർ പുറത്തുവിടുന്നത്.
ഏറ്റവും വലിയ ആക്ഷൻ ചിത്രങ്ങളിലൊന്നായ കെജിഎഫ് സംവിധാനം ചെയ്ത പ്രശാന്ത് നീലും സൂപ്പർസ്റ്റാർ പ്രഭാസും ആദ്യമായി ഒരുമിക്കുന്നതിലൂടെ ഈ വർഷത്തെ ഏറ്റവും വലിയ പാൻ ഇന്ത്യൻ ചിത്രമായി സലാർ മാറുമെന്നാണ് ആരാധകർ പ്രതീക്ഷിക്കുന്നത്.
സലാറിൽ പ്രഭാസിനൊപ്പം പൃഥ്വിരാജ് സുകുമാരൻ, ശ്രുതി ഹാസൻ, ജഗപതി ബാബു എന്നിവരും അഭിനയിക്കുന്നുണ്ട്. ഭുവൻ ഗൗഡ ഛായാഗ്രാഹണം നിർവഹിക്കുന്ന സലാറിൽ ശ്രുതി ഹാസനാണ് നായിക. വിജയ് കിരാഗന്ദൂറിന്റെ ഉടമസ്ഥതയിലുള്ള ഹോംബാലെ ഫിലിംസാണ് ചിത്രം നിർമിക്കുന്നത്. സെപ്റ്റംബർ 28-ന് ചിത്രം തിയേറ്ററുകളിൽ എത്തും.
Comments