ലണ്ടൻ: ചരിത്രത്തിലേക്ക് റാക്കറ്റ് വീശി സെർബിയയുടെ സൂപ്പർ താരം നൊവാക് ജോക്കോവിച്ച് വിംബിൾഡൺ ടെന്നിസ് പുരുഷ വിഭാഗം ഫൈനലിൽ. ലണ്ടനിൽ നടന്ന ആദ്യ പുരുഷ സിംഗിൾസ് സെമി ഫൈനലിൽ 21 കാരനായ ഇറ്റലിയുടെ ജാനിക് സിന്നറെ 6-3, 6-4, 7-6 എന്ന സ്കോറിന് പരാജയപ്പെടുത്തിയാണ് 36കാരനായ താരം തന്റെ 35-ാമത് ഗ്രാൻസ്ലാം കിരീടത്തിന്റെ കലാശപ്പോരിന് ഇറങ്ങുന്നത്. വിംബിൾഡണിൽ നൊവാക് ജോക്കോവിച്ചിന്റെ ഒമ്പതാം ഫൈനലാണ് നാളെ അരങ്ങേറുക.
ഇതാദ്യമായാണ് ഒരു പുരുഷ താരം 35 ഫൈനലുകൾ കളിക്കുന്നത്. ഈ വർഷം ഫ്രഞ്ച്, ഓസ്ട്രേലിയൻ ഓപ്പണുകളിലും നൊവാക് ജോക്കോവിച്ച് മുത്തമിട്ടിരുന്നു. റഷ്യയുടെ ഡാനിൽ മെദ്വദേവും- സ്പെയിനിന്റെ കാർലോസ് അൽകാരസും തമ്മിലുളള മത്സരത്തിലെ വിജയിയെയാണ് നാളെ നടക്കുന്ന ഫൈനലിൽ താരം നേരിടുക. നാളെ നടക്കുന്ന പുരുഷ വിഭാഗം ഫൈനലിൽ മുത്തമിട്ടാൽ 24ാം ഗ്രാൻഡ്സ്ലാം കിരീടമെന്ന അപൂർവ നേട്ടമായിരിക്കും നൊവാക് ജോക്കോവിച്ചിനെ കാത്തിരിക്കുന്നത്.
Comments