ദുബായ്: പ്രധാനമന്ത്രി നരേന്ദ്രമോദിയ്ക്ക് യുഎഇ ഒരുക്കിയത് ഉജ്ജ്വല സ്വീകരണം. ഇന്ത്യൻ ത്രിവർണ്ണ പതാകയണിഞ്ഞ് ലോകത്തിലെ ഏറ്റവും ഉയരംകൂടിയ കെട്ടിടമായ ദുബായിലെ ബുർജ് ഖലീഫ അദ്ദേഹത്തെ വരവേറ്റു. കൂടാതെ പ്രധാനമന്ത്രി നരേന്ദ്രമോദിയുടെ ചിത്രവും ബുർജ് ഖലീഫ പ്രദർശിപ്പിച്ചു.
വെള്ളിയാഴ്ച രാത്രിയാണ് ഔദ്യോഗിക സന്ദർശനത്തിനായി ഗൾഫ് രാഷ്‌ട്രത്തിലേക്കുള്ള പ്രധാനമന്ത്രിയുടെ വരവിന് വേദിയൊരുക്കി കൊണ്ട് ബുർജ് ഖലീഫ ഇന്ത്യൻ ദേശീയ പതാകയുടെ നിറങ്ങളാൽ പ്രകാശിതമായത്. തുടർന്ന് ‘ബഹുമാനപ്പെട്ട പ്രധാനമന്ത്രി നരേന്ദ്രമോദിയെ സ്വാഗതം ചെയ്യുന്നു’ എന്ന എന്ന സന്ദേശവും ബുർജ് ഖലീഫയിൽ പങ്കുവെച്ചു.
യുഎഇ ദ്വിരാഷ്‌ട്ര സന്ദർശനത്തിന്റെ ഭാഗമായി അബുദാബി വിമാനത്താവളത്തിലെത്തിയ പ്രധാനമന്ത്രിയെ അബുദാബി കിരീടാവകാശി ഷെയ്ഖ് ഖാലിദ് ബിൻ മുഹമ്മദ് ബിൻ സായിദ് സ്വീകരിച്ചു. വിമാനത്താവളത്തിൽ പ്രധാനമന്ത്രിയ്‌ക്ക് രാജകീയ സ്വീകരണമാണ് ഒരുക്കിയത്. ശേഷം കിരീടാവകാശിയ്‌ക്ക് ട്വിറ്ററിലൂടെ പ്രധാനമന്ത്രി നന്ദി അറിയിച്ചു.
‘ഇന്ന് വിമാനത്താവളത്തിൽ എനിക്ക് നൽകിയ മികച്ച സ്വീകരണത്തിന് കിരീടാവകാശി ഷെയ്ഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാനോട് നന്ദി പറയുന്നു’. എന്നായിരുന്നു പ്രധാനമന്ത്രിയുടെ ട്വീറ്റ്. യുഎഇ സന്ദർശനത്തിന്റെ ഭാഗമായി പ്രധാനമന്ത്രി അബുദാബി കിരീടാവകാശിയുമായി കൂടിക്കാഴ്ച നടത്തും. കൂടിക്കാഴ്ചയിൽ ഇരുവരും ഉഭയകക്ഷി ചർച്ച നടത്തും.
