സഹായിക്കണം, ഇന്ത്യയോട് കൈക്കൂപ്പി ഇറാൻ! ഞങ്ങളുടെ കുട്ടികൾക്ക് പ്രചോദനം ധോണിയും കോഹ്ലിയും; ക്രിക്കറ്റിൽ അഫ്ഗാന് നൽകിയ പിന്തുണ തങ്ങൾക്കും ലഭിക്കുമെന്ന് പ്രതീക്ഷ

ടെഹ്റാൻ: ഇറാൻ ക്രിക്കറ്റിനെ സഹായിക്കണമെന്ന് ഇന്ത്യയോട് അപേക്ഷയുമായി ഇറാൻ അണ്ടർ19 കോച്ച് അസ്ഗർ അലി റയീസ്.ബിസിസിഐയോട് സാമ്പത്തിക സഹായമാണ് അസ്ഗർ അലി അഭ്യർത്ഥിക്കുന്നത്. ഐ.സി.സി 2018ൽ ഇറാന് അന്താരാഷ്‌ട്ര തലത്തിൽ ടി20 കളിക്കാൻ അനുമതി നൽകിയിരുന്നു. പിന്നീട് യു.എ.ഇ, കുവൈറ്റ്, ഖത്തർ എന്നിവരുമായി ചില മത്സരങ്ങളും അവർ കളിച്ചിരുന്നു.എന്നാൽ വലിയ മാറ്റമൊന്നും ഇതിന് ശേഷം ഉണ്ടായില്ല. ഇതിന് പിന്നാലെയാണ് ഇന്ത്യയ്‌ക്ക് മുന്നിൽ അപേക്ഷയുമായി ഇറാനെത്തിയത്.

‘ലോകോത്തര ക്രിക്കറ്റ് സ്റ്റേഡിയം പണിയുവാൻ ബിസിസിഐ സഹായിക്കണം. കൂടാതെ തങ്ങളുടെ താരങ്ങൾക്ക് മികച്ച പരിശീലനം നൽകാനും സഹായിക്കണം. ഒരിക്കൽ ഞങ്ങളുടെ താരങ്ങൽ ഐപിഎല്ലിലും കളിക്കും.ഇറാനിയൻ താരങ്ങൾ എം എസ് ധോണിയേയും വിരാട് കോഹ്ലിയേയും ആരാധിക്കുന്നവരാണ്. അവരുടെ വീഡിയോ കാണിച്ച് താരങ്ങളെ പ്രചോദിപ്പിക്കാറുണ്ട്. അന്താരാഷ്‌ട്ര തലത്തിൽ മികച്ച ക്രിക്കറ്റ് കളിക്കാൻ കഴിവുള്ളവരാണ് ഇറാൻ താരങ്ങൾ .

എന്നാൽ അടിസ്ഥാനസൗകര്യങ്ങളുടെ അഭാവത്തിൽ കളിക്കാർക്ക് പരിശീലനം നൽകാൻ കഴിയുന്നില്ല. ഇന്ത്യ സഹായിച്ചാൽ ഇറാൻ കളിക്കാർക്ക് തങ്ങളുടെ കഴിവ് ലോകത്തിന് മുന്നിൽ തെളിയിക്കാൻ കഴിയും.” ഇറാൻ കോച്ച് ബിസിസിഐയോട് അഭ്യർത്ഥിച്ചു.പുതിയ ക്രിക്കറ്റ് സ്റ്റേഡിയത്തിനായി സ്ഥലം കണ്ടെത്തിയിരുന്നു. എന്നാൽ അമേരിക്കയുടെ ഉപരോധം കാരണം ഫണ്ട് ലഭിക്കുന്നില്ല. നിർമാണം നീണ്ടുപോവുകയും ചെയ്യുന്നു.’ അഫ്ഗാന് ബിസിസഐയിൽ നിന്നും ലഭിച്ച പിൻതുണ തങ്ങൾക്കും ലഭിക്കുമെന്ന പ്രതീക്ഷയിലാണ് ഇറാൻ കോച്ച്.

അഫ്ഗാനിസ്ഥാൻ ക്രിക്കറ്റിന്റെ വളർച്ചയിൽ ബിസിസിഐ വലിയ പങ്കുണ്ട്. തുടക്കകാലത്ത് ബിസിസിഐ അഫ്ഗാൻ ക്രിക്കറ്റിനെ വലിയ രീതിയിൽ പിന്തുണച്ചിട്ടുണ്ട്. 2017 ൽ നോയിഡയിലെ ക്രിക്കറ്റ് സ്റ്റേഡിയം അഫ്ഗാനിസ്ഥാന് ഹോം മത്സരങ്ങൾക്കായും പരിശീലനത്തിനായും ബിസിസിഐ വിട്ടുനൽകിയിരുന്നു. ബിസിസിഐയുടെ സഹായത്തോടെ വലിയ വളർച്ച അഫ്ഗാൻ ക്രിക്കറ്റിനുണ്ടായി. ഇപ്പോൾ മറ്റൊരു രാജ്യം കൂടി ബിസിസിഐയുടെ സഹായത്തിനായി അഭ്യർത്ഥിക്കുകയാണ്.