ഇന്ത്യൻ ക്രിക്കറ്റ് ടീമിൽ ഉടൻ തലമുറ മാറ്റം നടക്കുമെന്ന് ക്യാപ്റ്റൻ രോഹിത് ശർമ്മ. വെസ്റ്റ് ഇൻഡീസിനെതിരായ ഇന്ത്യയുടെ 100-ാം ടെസ്റ്റിന് തയ്യാറെടുക്കുമ്പോൾ, ടീമിലെത്തുന്ന യുവതാരങ്ങളുടെ മികച്ച പ്രകടനത്തെ രോഹിത് അംഗീകരിക്കുകയും അവർക്ക് ചുമതലകളുടെ വ്യക്തത നൽകാനുള്ള മുതിർന്ന കളിക്കാരുടെ ഉത്തരവാദിത്തം ഊന്നിപ്പറയുകയും ചെയ്തു.
‘മാറ്റം എന്നായാലും സംഭവിക്കണം,യുവതാരങ്ങൾ നന്നായി പ്രവർത്തിക്കുന്നതിൽ എനിക്ക് സന്തോഷമുണ്ട്. അവർക്ക് ചുമതലയിൽ വ്യക്തത നൽകേണ്ടതിനാൽ ഞങ്ങളുടെ പങ്ക് പ്രധാനമാണ്. ടീമിനായി മികച്ച പ്രകടനം പുറത്തെടുക്കണമെങ്കിൽ തയ്യാറെടുപ്പും പ്രകടനം നടത്തുകയും ചെയ്യേണ്ടത് അവരാണ്. ഇന്ത്യൻ ക്രിക്കറ്റിന്റെ ഭാവി യുവതാരങ്ങളിലാണ്. താരങ്ങൾ ഇന്ത്യൻ ക്രിക്കറ്റിനെ കൂടുതൽ ഉയരങ്ങളിലേക്ക് കൊണ്ടുപോകും.’ഇന്ത്യൻ ടീമിലെ യുവകളിക്കാരുടെ കഴിവുകളെ ചൂണ്ടിക്കാണിച്ചുകൊണ്ട് രോഹിത് പറഞ്ഞു.
പരമ്പരയിലെ ആദ്യ ടെസ്റ്റിൽ കൂറ്റൻ വിജയം നേടിയ ടീമിൽ മാറ്റങ്ങൾ ഒന്നും ഉണ്ടാകില്ലെന്ന സൂചനയാണ് ക്യാപ്റ്റൻ നൽകിയത്. എങ്കിലും ക്വൂൻസ് പാർക്ക് ഓവലിലെ പിച്ചിന്റെ സ്വാഭാവം കണക്കിലെടുത്ത് രണ്ടാം ടെസ്റ്റിൽ ആവശ്യമെങ്കിൽ കൂടുതൽ സ്പിന്നർമാരെ കളിപ്പിക്കുന്നത് പരിഗണിക്കും.
‘ഡൊമിനിക്കയിലെ പിച്ച് കണ്ടപ്പോൾ തന്നെ ഞങ്ങൾക്ക് വ്യക്തമായ ധാരണയുണ്ടായിരുന്നു. പക്ഷേ ഇവിടത്തെ പിച്ചിനെക്കുറിച്ച് തങ്ങൾക്ക് കാര്യമായ ധാരണകളില്ല, വെല്ലുവിളിയുണ്ടായേക്കും’-രോഹിത് പറഞ്ഞു.
Comments