മുംബൈ;അടുത്തമാസം അയർലാൻഡിൽ ആരംഭിക്കുന്ന ടി20 പരമ്പരയ്ക്കുള്ള സിനിയർ ടീമിനെ നയിക്കാൻ മലയാളിതാരം സഞ്ജു സാംസണെ തിരഞ്ഞെടുത്തേക്കുമെന്ന് സൂചന. ഹാർദ്ദിക്ക് പാണ്ഡ്യയ്ക്ക് വിശ്രമം അനുവദിച്ചേക്കുമെന്ന് ദേശീയ മാദ്ധ്യമങ്ങൾ റിപ്പോർട്ട് ചെയ്തതോടെയണ് മലയാളി താരത്തിന്റെ സാദ്ധ്യതകൾ ഏറിയത്. ഹാർദ്ദിക്കിനെക്കൂടാതെ വെസ്റ്റിൻഡീസിനെതിരെ ഇന്ത്യൻ ടെസ്റ്റ് ടീമിൽ ഉൾപ്പെട്ട യുവ ഓപ്പണർ ശുഭ്മൻ ഗില്ലിനും ഇഷാൻ കിഷനും വിശ്രമം നൽകിയേക്കും.
സീനിയർ താരം സൂര്യകുമാർ യാദവ് ടീമിനെ നയിക്കുമെങ്കിൽ സഞ്ജു ഉപനായകനായേക്കുമെന്നും സൂചനയുണ്ട്. നിലവിൽ ടി20 ടീമിന്റെ വൈസ് ക്യാപ്റ്റനാണ്. എന്തായാലും വിൻഡീസിനെതിരെയുള്ള ഏകദിന ടി20 പരമ്പരയ്ക്ക് ശേഷമാകും അന്തിമ തീരുമാനമുണ്ടാകുക. ഫ്ളോറിഡയിൽ നിന്നും ഡബ്ലിനിലേക്കു യാത്ര തിരിക്കും മുമ്പ് മൂന്നു ദിവസത്തെ ഇടവേള മാത്രമേ താരങ്ങൾക്കു ലഭിക്കുകയുള്ളൂ.
ലോകകപ്പും അതിന് മുമ്പുളള തിരിക്കേറിയ ഷെഡ്യുളുകളും പരിഗണിച്ചാകും ഹാർദ്ദിക്കിന് വിശ്രമം അനുവദിക്കുമെന്ന റിപ്പോർട്ടുകളെത്തിയത്. സെപ്തംബർ അവസാനത്തോടെ ഏകദിന ഫോർമാറ്റിലുള്ള ഏഷ്യാ കപ്പും ഒക്ടോബറിൽ ഐസിസി ഏകദിന ലോകകപ്പും നടക്കാനിരിക്കുകയാണ്. ഇവ മുന്നിൽ കണ്ടാണ് ചില പ്രധാനപ്പെട്ട താരങ്ങൾക്കു അയർലാൻഡ് പര്യടനത്തിൽ വിശ്രമം നൽകാൻ ഇന്ത്യ ആലോചിക്കുന്നത്.
