കാര്യവട്ടത്ത് വീണ്ടും ടി-20; ഇന്ത്യ- ഓസ്‌ട്രേലിയ മത്സരം നവംബർ 26ന്

തിരുവനന്തപുരം: അന്താരാഷ്‌ട്ര മത്സരത്തിന് വീണ്ടും വേദിയാകാനൊരുങ്ങി തലസ്ഥാനം. നവംബർ 26 ന് ഇന്ത്യ- ഓസ്‌ട്രേലിയ ട്വന്റി ട്വന്റി മത്സരത്തിന് കാര്യവട്ടം ഗ്രീൻഫീൽഡ് സ്റ്റേഡിയം വേദിയാകും. ഞായറാഴ്ച രാത്രി ഏഴ് മണിക്കാണ് മത്സരം. മൂന്ന് ഏകദിനങ്ങളും അഞ്ച് ട്വൻറി 20കളുമാണ് ഓസീസിന്റെ ഇന്ത്യൻ പര്യടനത്തിലുള്ളത്.

ഏകദിന പരമ്പരയോടെയാണ് പര്യടനം ആരംഭിക്കുക. ഏകദിന പരമ്പര ഇന്ത്യ ആതിഥേയത്വം വഹിക്കുന്ന ലോകകപ്പിന് മുമ്പും ട്വൻറി 20 പരമ്പര ലോകകപ്പിന് ശേഷവുമായിരിക്കും അരങ്ങേറുക. 2023 ജനുവരി 15ന് ശ്രീലങ്കയ്‌ക്കെതിരെയുളള ഇന്ത്യയുടെ ഏകദിന മത്സരമാണ് ഗ്രീൻഫീൽഡ് സ്റ്റേഡിയത്തിൽ അവസാനം നടന്നത്. ഈ മത്സരത്തിൽ ടീം ഇന്ത്യ 317 റൺസിന്റെ വിജയം നേടിയിരുന്നു.

സെപ്റ്റംബർ 22(മൊഹാലി), സെപ്റ്റംബർ 24(ഇൻഡോർ), സെപ്റ്റംബർ 27(രാജ്കോട്ട്) എന്നിവിടങ്ങളിലാണ് ഏകദിനങ്ങൾ. നവംബർ 23 (വിശാഖപട്ടണം), നവംബർ 26(തിരുവനന്തപുരം), നവംബർ 28(ഗുവാഹത്തി), ഡിസംബർ 1(നാഗ്പൂർ), ഡിസംബർ 3(ഹൈദരാബാദ്) തിയതികളിലാണ് ഇന്ത്യ-ഓസീസ് ട്വൻറി 20 മത്സരങ്ങൾ.