പുതിയ ഇലക്ട്രിക് സ്കൂട്ടർ പുറത്തിറക്കാനൊരുങ്ങി ബാംഗ്ലൂർ ആസ്ഥാനമായുള്ള ഇവി സ്റ്റാർട്ടപ്പ് കമ്പനി. എതർ എനർജിയാണ് 450S എന്ന ഇവി വിപണിയിലിറക്കാൻ പോകുന്നത്. ഓഗസ്റ്റ് മൂന്നിനാകും ഇത് പുറത്തിറക്കുക. കമ്പനി പ്രീ-ബുക്കിംഗ് ആരംഭിച്ച് കഴിഞ്ഞു. 2,500 രൂപ നൽകി ഉപഭോക്താക്കൾക്ക് സ്കൂട്ടർ ബുക്ക് ചെയ്യാവുന്നതാണ്.
1,29,999 രൂപയാണ് സ്കൂട്ടറിന്റെ പ്രാരംഭ വില. അടുത്തിടെ ഇവിയുടെ ടീസർ കമ്പനി പുറത്തുവിട്ടിരുന്നു. ഇതനുസരിച്ച് ഒറ്റ ചാർജിൽ 115 കിലോമീറ്റർ ഓടുമെന്ന് കമ്പനി അവകാശപ്പെടുന്നു. വെറും 3.9 സെക്കൻഡിൽ 0-40 കിലോമീറ്റർ വേഗത സ്കൂട്ടർ കൈവരിക്കും. മണിക്കൂറിൽ 90 കിലോമീറ്ററായിരിക്കും ഇതിന്റെ ഉയർന്ന വേഗത. 450X മോഡലിന അടിസ്ഥാനമാക്കിയുള്ളതായിരിക്കും പുത്തൻ മോഡലെന്നാണ് റിപ്പോർട്ട്.
സ്കൂട്ടർ സ്പീഡോ, റേഞ്ച്, റൈഡ് മോഡുകൾ, ബ്ലൂടൂത്ത് കണക്റ്റിവിറ്റി, പുതിയ സ്ക്രീൻ എന്നിവയും നൽകും. സ്ക്രീൻ ടിഎഫ്ടി അല്ലെങ്കിൽ എൽസിഡി ആയിരിക്കുമോ എന്നത് ഇതുവരെ വെളിപ്പെടുത്തിയിട്ടില്ല. സാൾട്ട് ഗ്രീൻ, കോസ്മിക് ബ്ലാക്ക്, സ്പേസ് ഗ്രേ, സ്റ്റിൽ വൈറ്റ് എന്നിങ്ങനെ ആകർഷകമായ നാല് നിറങ്ങളിലാകും ഇ-സ്കൂട്ടർ ലഭിക്കുക. പ്രീ ബുക്കിംഗിനും കൂടുതൽ വിവരങ്ങൾക്കുമായി https://app.atherenergy.com/product/450x/book സന്ദർശിക്കുക.
